Përmes përgjimeve, zëvendësministri Cena u zbulua për ryshfetmarrje

Shehu, sipas hetimeve të Prokurorisë, kishte pranuar një telefonatë nga zëvendësministri Cena pesë minuta para orës 11:00 të shtunën, periudhë kjo ku Shehu në koordinim me zyrtarin e Komunës së Rahovecit, Nysret Shalën po planifikonin që të merrnin një ryshfet nga një qytetar në shkëmbim që të dy në koordinim t’ia mundësonin këtij të fundit të fitonte një grant në bujqësi nga Agjencia për Zhvillim Rajonal (AZHR), shkruan sot “Koha Ditore”.

Nga informatat që i ka siguruar gazeta nga burime të sigurta, zëvendësministri Cena nuk ka qenë pjesë e hetimeve që po zhvilloheshin nga ana e Policisë. Hetimet kishin filluar javë më parë kur një qytetar kishte lajmëruar Policinë e Kosovës se Hazer Shehu, pronar i kompanisë “Gentle Research”, e cila bën hartimin e biznes planeve për përfitim të granteve nga donatorët, i kishte kërkuar ryshfet që të fitonte këtë grant. Policia në koordinim me Prokurorinë e Shtetit përmes metodave të simulimit kanë nisur hetimin e rastit.

Shala e Shehu kanë qenë duke u përgjuar nga Policia, por jo edhe zëvendësministri Cena. Derisa të shtunën planifikohej që qytetari të dorëzonte paratë përmes masave të fshehta pjesë e hetimit është bërë edhe Cena.