Kush është Marco Ianni? Trajneri që provokoi Mourinhon të ndeshej fizikisht me të

Sot u zhvillua derbi i javës mes Chelseat dhe Manchester Unitedit në Stamford Bridge që përfundoi me rezultat të barabartë 2 me 2.

Protagonist i ndeshjes u bë sërish Jose Mourinho – trajneri pranë shkarkimit – shkaku i një gjesti në fund të takimit që e morë vëmendjen nga fusha e lojës.

Ross Barkley në sekondat e fundit nuk e la skuadrën e Mourinhos që t’i merrte tri pikë nga Stamford Bridge, dhe kjo bëri që ndihmëstrajneri i dytë Marco Ianni të provokonte Mourinhon duke festuar para hundëve të tij – derisa ky i fundit ishte i nxehur nga pësimi i golit.

Mourinho ishte ngritur në këmbë dhe kishte dashur të konfrontohej me italianin, por u ndalua nga sigurimi dhe nga lojtarët e të dyja skuadrave.

Por, çka dihet për Marco Iannin? Jo shumë, shkruan The Sun. Ai është lindur më 1982 dhe ka kaluar dy vite si ndihmës i Sarrit edhe te skuarda e Napolit. Te Chelsea, trajnerë të tjerë që ndihmojnë Sarrin janë edhe legjendat italiane të ekipit, Gianfranco Zola dhe Carlo Cudicini, por edhe portieri i dikurshëm Henrique Hilario.

Ianni nuk ka qenë asnjëherë futbollist, dhe duket se nuk ka ambicje për t’u bërë kryetrajner – por pas vëmendjes që mori pas incidentin me Mourinhon, kjo gjë mund të ndryshojë.

Mourinho pas ndeshjes bëri me dije se Sarri i ka kërkuar falje për incidentin Mourinhos dhe i ka thënë se do ta ndëshkojë Iannin për sjelljen e tij. Ndërkohë që edhe Ianni i kishte shkuar në zyren e Sarrit për t’i kërkuar falje, pas së cilës Mourinho i kishte thënë se e pranonte dhe se nuk do ta vriste për vetëm një gabim. /Periskopi