Jemeni vuan nga uria më e keqe në 100 vjet – alarmon OKB-ja

Jemeni mund të përballet me vuajtjen më të keqe nga uria në 100 vitet e fundit, nëse sulmet ajrore të udhëhequra nga koalicioni saudit nuk ndalen, paralajmëron OKB-ja.

Siç shkruan The Guardian, përkthen Periskopi, nëse lufta vazhdon, uria mund ta gllabërojë vendin në tre muajt e ardhshëm, me 12 deri në 13 milionë civilë në rrezik për të vdekur nga një gjendje e tillë, sipas Lise Grande, koordinatorja e agjencisë për Jemen.

Ajo i tha BBC-së: “Mendoj që shumë prej nesh nuk kishin besuar që në shekullin 21 mund të shihnim diçka të ngjashme me atë që pamë në Etiopi, apo në Bengal, apo në disa pjesë të Bashkimit Sovjetik – ajo ishte krejt e papranueshme.”

“Shumë prej nesh kanë bindjen që kjo kurrë s’mund të ndodh sërish por realiteti është që në Jemen po shohim pikërisht diçka të tillë.”

Jemeni ka qenë i përfshirë në një luftë të përgjakshme civile për tri vite rresht pasi rebelët Houthi, të mbështetur nga Irani, e morën nën sund një pjesë të madhe të vendit, përfshirë edhe kryeqytetin, Sana’a-në. Koalicioni i udhëhequr nga sauditët, përkthen Periskopi, ka qenë duke luftuar rebelët që nga viti 2015 në mbështetje të një qeverie të njohur ndërkombëtarisht. /Periskopi