Haradinaj: Mali i Zi udhërrëfyes për rrugën tonë euro-atlantike

Kryeministri i Kosovës, Ramush Haradinaj, ka pritur sot në takim ministrin e Mbrojtjes të Malit të Zi, Predrag Boshkoviq, me të cilin ka biseduar për zhvillimet e fundit politike dhe të sigurisë në vend dhe rajon.

Haradinaj ka njoftuar ministrin Boshkoviq rreth hapave të ndërmarrë për transformimin  e FSK-së dhe të ardhmen euroatlantike të Kosovës, duke vlerësuar se Kosova dhe Mali i Zi kanë raporte të mira ndërfqinjësore.

Ai ka thënë se bashkëpunimi ndërmjet dy vendeve mike duhet të vazhdojë edhe në fushën e sigurisë, në atë ekonomike dhe politike.

Ky është postimi i plotë:

“Përvoja e Malit të Zi, si anëtar i NATO-s, na shërben në rrugën tonë të anëtarësimit në paktin veri-atlantik. Ministrin e Mbrojtjes të Malit të Zi, Predrag Boskovic, e falënderova për përkrahjen dhe gatishmërinë për fuqizmin e partneritetit në fushën e sigurisë, gjithmonë në funksion të stabilitetit dhe sigurisë në Ballkanin Perëndimor. Me tranzicionin e FSK-së, Kosova po e përmbyllë arkitekturën e saj të sigurisë, si garancë për stabilitet dhe paqe të qëndrueshme edhe në rajon e më gjerë.”/Periskopi/