Hahn: BE mbështet marrëveshjen Kosovë- Serbi që nuk shkakton precedent

Komisari europian për Zgjerim, Johannes Hahn, i tha gazetës serbe “Novosti” se BE-ja mbështet plotësisht dialogun midis Beogradit e Prishtinës, ndërsa si marrëveshje përfundimtare konsideron një zgjidhje të zbatueshme, të qëndrueshme dhe reale në përputhje me të drejtën ndërkombëtare dhe rrjedhat juridike në BE.

BE nuk spekulon rreth elementeve të mundshme të marrëveshjes përfundimtare juridikisht të detyrueshme.

“Cilado marrëveshje duhet të jetë specifike dhe e ndërtuar me masë, që të mos shkaktojë precedent dhe të kontribuojë për stabilitetin rajonal dhe rrugën e rajonit në BE”, ka thënë Hahn.

I pyetur për shanset e Serbisë për tu bërë anëtare deri në vitin 2025, Komisioneri evropian Johannes Hahn u përgjigj për ‘Novosti’ se: “Presidenti i Komisionit Europian Jean-Claude Juncker e ka bërë të qartë që asnjë shtet nuk mund të hyjë në BE pa zgjidhur çështjet e hapura bilaterale.”

Ndërsa shtoi: “Për Serbinë kjo do të thotë se është e nevojshme që të arrijë një marrëveshje ligjore me Prishtinën dhe të zbatojë në mënyrë të përhershme”.