Sektori i shëndetësisë sfidohet më së shumti nga shkelja e privatësisë

Drejtori i kësaj agjencie, Jeton Arifi, ka folur rreth përkushtimit që do ta kenë gjatë vitit 2018 lidhur me mbrojtjen e të dhënave personale në sektorin e shëndetësisë. Po ashtu, edhe vetëdijesimi i qytetarëve për të drejtat e tyre, ka qenë pikëorientimi i kësaj agjencie.

Më tej, përfaqësuesi i Ministrisë së Shëndetësisë, njëkohësisht drejtori i Fondit për Sigurime Shëndetësore,  Fatmir Plakiqi, ka folur rreth përkushtimit që ka kjo ministri në respektimin e të drejtës në privatësi të pacientëve nga personeli mjekësor në nivel vendi, si dhe bashkëpunimin ndërinstitucional me ASHMDHP-në.  Gjendjen e privatësisë në shëndetësi e sheh si një çështje komplekse.

“Ky sektor ka më së shumti sfidohet nga shkelja e privatësisë, duke pasur parasysh edhe faktin që vetë sistemi e ka në qendër pacientin. Në bashkëpunim me Agjencinë Shtetërore për Mbrojtjen e të Dhënave Personale, Ministria e Shëndetësisë ka caktuar zyrtarët për përgjegjës në ministri dhe në spitalet e përgjithshme për të zbatuar obligimet për mbrojtjen e të dhënave personale”, theksoi ai.

Më tej ai ka treguar edhe fokusin e sivjetmë që të informojnë sa më shumë publikun(pacientët) edhe  personelin shëndetësor për ligjin e mbrojtjes së privatësisë dhe ngritjen e nivelit të privatësisë në shëndetësi.

Pjesëmarrës në këtë konferencë ishte edhe koordinatorja për të drejtat njerëzore, Julia Jacoby, nga zyret e EU-së, e cila ka shprehur gatishmërinë për të bashkëpunuar me ASHMDHP-në.

Më pas drejtori i përgjithshëm i Agjencisë Shtetërore për Mbrojtjen e të Dhënave Personale, Bujar Sadiku,  ka shpalosur zhvillimit e fundit të autoritetit të vetëm, të ngarkuar me mbikëqyrjen e zbatimit të së drejtës në privatësi.

“Theksoj se Agjencia në këtë vit, prioritet do ta ketë shëndetësinë, duke ofruar këshilla, trajnime, si dhe për të mbikëqyrur punën e mantelbardhëve me të vetmin qëllim që qytetarët tanë të marrin shërbime mjekësore pa qenë të shqetësuar për sigurinë e të dhënave të tyre, të cilat i deponojnë gjatë pranisë në ordinanca të ndryshme apo kudo tjetër në institucione shëndetësore”, tha ai.

Inspektori i mbrojtjes së të dhënave, nga Shqipëria, Edrin Fidhe, nga Komisioneri i Informimit dhe Mbrojtjes së të Dhënave Personale, i cili ka ndarë praktikat apo përvojën e tyre në bashkëpunim me sektorin e shëndetësisë.  Ai këtë përvojë e ka paraqitur përmes një prezantimi të shkurtër statistikor.

“Katër detyrat kryesore që kemi parashikuar në rastin konkret, që është: garantimi i detyrimit për informim të subjekteve të të dhënave, kemi konstatuar që shumica e kontrolluesve  publik dhe privat nuk i informojnë pacientët për të drejtat që kanë sa i përket të dhënave sensitive. Kjo është një gjë shumë e rëndësishme pasi iu jep mundësinë pacientëve që të vetëmbrohen, si element i parë dhe më pas t’i drejtohen zyrës së komisionerit”, tha ai.

Agjencia Shtetërore për Mbrojtjen e të Dhënave Personale, si institucion i pavarur, ka përgjegjësinë ligjore për mbikëqyrjen e zbatimit të rregullave për mbrojtjen e të dhënave personale. Kjo agjenci, në qershor të këtij viti do ta shënojë edhe përvjetorin e shtatë të themelimit të saj.