Notat në ditar më nuk do të vihen me numra, kjo është metoda e re

Mësimdhënësja Selvete Mujaj ka bërë të ditur se në shkollën “Faik Konica”, ka filluar së aplikuari vlerësimi përshkrues sipas udhëzimit administrativ, duke treguar kështu përshkrimin për secilin nivel të nxënësit.

E psikologia e shkollës thotë se ky vlerësim nga nxënësit ende është i panjohur dhe ndoshta i papranueshëm, meqë kryesisht klasat e para dhe të dyta janë të prira të notohen me notat 4 ose 5.

Por, sipas saj, kjo formë u mundëson edhe prindërve që të kërkojnë më shumë llogari nga mësimdhënësit për rezultatin e fëmijëve të vet.

Edhe në shkollën model “Qamil Batalli”, po aplikohet ky vlerësim.

Sipas prindërve, kjo është në të mirë të fëmijëve, por që ende as ata nuk po e kuptojnë mirë konceptin e këtij vlerësimi.

E, sipas zyrtarëve të shkollës, deri tash nuk është paraqitur asnjë ankesë nga prindërit, çka do të thotë se vlerësimi është pranuar mirë.

Mustafë Kadriu, udhëheqës i Divizionit për Vlerësim në Ministrinë e Arsimit, ka thënë se nuk bëhet fjalë për eksperiment, ndaj dhe kjo formë e vlerësimit të nxënësve do të vazhdojë.

Klasat e para dhe të dyta, përveç gjatë orës mësimore, këtë lloj vlerësimi do ta kenë në vazhdimësi.

Ndryshimi i vetëm do të jetë se kur të përfundohet edhe klasa e dytë, nxënësit suksesin do ta kenë me shkronja.
Shkronja A, tregon nivelin e lartë të mësimnxënies deri te shkronja C, ku tregon për sukses të mjaftueshëm për nxënësit.