Ministri i Drejtësisë kërkon nga Serbia zbardhjen e krimeve të luftës

Ministri kosovar i Drejtësisë, Abelard Tahiri, ka dhënë një intervistë për gazetën beogradase Danas. Ai ka reflektuar te kërkesa e Serbisë për t’u përfshirë në hulumtimin për vrasjen e Oliver Ivanoviqit. Tahiri ka thënë se Kosova ka nënshkruar një protokoll bashkëpunimi në dialogun e Brukselit dhe është e gatshme të bashkëpunojë me çdo shtet, përfshirë Serbinë në shkëmbim informatash, por ka ftuar Serbinë të bashkëpunojnë fillimisht në gjetjen e vrasësve të vëllezërve Bytyqi, krimeve të luftës si dhe dyshimet për djegien e trupave të zhdukur shqiptarë, lëndë që asnjëherë nuk janë proceduar nga gjykatat serbe.

Sipas Danasit, Tahiri, po ashtu, ka ftuar shtetin serb të përgjigjet se kush i ka vrarë fëmijët serbë në kafenenë “Panda” më 1998, një krim për të cilin vetë Presidenti serb pati hedhur dyshime që është kryer nga shërbimet serbe të inteligjencës.

Tahiri në këtë intervistë ka deklaruar se ka dy pengesa të mëdha në këtë bashkëpunim në mes të dy shteteve, përkatësisht mosgatishmëria e Serbisë të merret me krimet e veta të 1999-ës, si dhe tentativat serbe për ta bllokuar Kosovën në anëtarësinë në INTERPOL.

“Është absurde që Kosova ka shqyrtuar në gjyqe të veta më shumë raste të krimeve të luftës se Serbia” derisa pohon se “është i vërtetuar fakti se liderët serbë policia, ushtrua dhe paramilitarët ishin përgjegjës për krime të tmerrshme”.

Tahiri në këtë gazetë prezantohet si një anëtar i ri i politikës shqiptare në Kosovë, “sikurse edhe Vlora Çitaku dhe Petrit Selimi”, ndërsa citohet se edhe portalet e Kosovës kanë quajtur ministrin e Drejtësisë si një nga shtyllat e reja të Partisë Demokratike të Kosovës.