Miliarderi Soros: Facebook-u dhe Google janë kërcënim për shoqërinë

Facebook-u dhe Google janë bërë “pengesa për inovacion” dhe përbëjnë “kërcënim” për shoqërinë ditët e së cilës janë të numëruara, ka thënë miliarderi dhe filantropi George Soros, në Forumin Ekonomik Botëror në Davos të martën – raporton Guardian, përcjell Periskopi.

“Minierat dhe kompanitë e naftës e eksploatojnë mjedisin fizik; kompanitë e mediave sociale eksploatojnë mjedisin social,” tha biznesmeni hungarezo-amerikan.

Ai ka shtuar se këto kompani të mediave sociale e ndikojnë mënyrën sesi njerëzit mendojnë dhe sillen madje duke mos qenë fare të vetëdijshëm për atë ndikim. Kjo – sipas tij – ka pasoja afatgjate për keqfunksionimin e demokracisë, duke ndërhyrë në legjitimitetin e zgjedhjeve.

“Fuqia për të formësuar vëmendjen e njerëzve po përqendrohet vetëm në duart e pak kompanive. Kërkon përpjekje të vërteta që të parashtrojmë e mbrojmë atë që John Stuart Mill e quajti “liria e mendjes”. Kjo është një mundësi që nëse humbet, njerëzit e rritur në epokën digjitale do ta kenë të vështirë ta rikthejnë. Kjo mund të ketë pasoja shumë të rënda politike.” – ka thënë ai.

“Ditët e shoqërisë janë të numëruara.” – ka paralajmëruar Soros në fjalimin e tij në Davos.

Soros është biznesmeni i fundit i profilit të lartë që foli hapur për platformat e internetit në Davos. Më herët, ka folur edhe Marc Benioff në lidhje me Facebookun dhe metodën me të cilën duhej të rregullohej ai.

Në nëntor, Roger McNamee, i cili ka qenë investitor i hershëm në Facebook, i ka përshkruar Facebookun dhe Googlen si kërcënim për shëndetin publik. Shkrimin e tij e gjeni të përkthyer në seksionin e Opinioneve në portalin Periskopi.