Kosova i ka gjashtë zëvendësministra të Ambientit, kurse ndotja e ajrit ka arritur shifra alarmante

Gjashtë zëvendësministra të Ministrisë së Mjedisit dhe Planifikimit Hapësinor nuk kanë prezantuar ndonjë plan për përmirësimin e ajrit në kryeqytet.

Fatmir Matoshi, Bashkim Musliu, Aleksander Spasic, Milena Zdravkovic, Kurtan Kajtazi dhe Besim Demi janë të gjashtë zëdhënësit e ministres Albena Reshitaj.

Nuk ka as reagim nga ana e tyre ndaj shqetësimit në rritje nga ana e qytetarëve për ajrin në të cilin po rrisin fëmijët.

Prej kohësh Prishtina kryeson listën e qyteteve botërore me ajrin më të ndotur por kjo nuk ka ndikuar në marrjen e masave të zbatueshme që do të ndikonin në të mirë të jetës së qytetarëve.

Mbrëmja e djeshme u cilësua e tmerrshme e shifra më të mira nuk pati as mbrëmë. Bazuar në matjen e bërë nga Qendra për matjen e cilësisë së ajrit e vendosur nga Ambasada Amerikane në Prishtinë, mbrëmë në orën 22:00 vlera e ndotjes ka arritur në 414 dhe konsiderohet e shumë e rrezikshme.

Ministrja Albena Reshitaj ka thënë se ndodhet jashtë vendit, ku po merr pjesë në Konferencën Botërore të Mjedisit, që po mbahet në Tallin të Estonisë.

Kryeministri Ramush Haradinaj është kritikuar vazhdimisht për numrin e madh të zëvendësministrave në kabinetin e tij qeveritar.

Ai gjithmonë është arsyetuar me faktin se të gjithë të emëruarve në këto pozita ‘do tu gjeje punë’.

Derisa të nis marrja e masave nga organet kompetente paralajmërohet se gjendje më e mirë nuk do të jetë as në ditët në vazhdim.