“Gjurmët e vrasësve të Ivanoviqit dërgojnë nga veriu”

Judah flet për vrasjen e Oliver Ivanoviqit Gazetari britanik Tim Judah, që është njohës i zhvillimeve në Ballkan, ka thënë se qytetarët që jetojnë në Mitrovicë të Veriut besojnë që fajtorët e vrasjes së liderit serb, Oliver Ivanoviq janë në veri të Kosovës.

“Çka kam kuptuar duke biseduar me miqtë dhe kontaktet e mia është se njerëzit në Mitrovicë të Veriut besojnë se gjurmët e fajtorëve (të vrasjes së Oliver Ivanoviqit) çojnë kah veriu, e jo kah jugu”, shkroi Judah në Twitter të martën. Ai tutje ka thënë se në Serbi vrasja e Ivanovicit po krahasohet me vrasjen e gazetarit Slavko Curuvija në vitin 1999.

“Në Beograd po bëhen krahasime me vrasjen e vitit 1999 të (gazetarit) Slavko Curuvija me gjasë nga shërbimet serbe të sigurimit.

Natyrisht, ende nuk ka asnjë dëshmi”, shkroi Judah. Gazetari Slavko Çuruvija është vrarë me 11 prill 1999. Shërbimi Sekret Serb e kishte pranuar që për kohë të gjatë e kishte përcjellë gazetarin Çuruvija për shkak të shkrimeve të tij lidhur me Kosovën, raporton Kallxo.com Ndryshe lideri i Iniciativës qytetare serbe, Oliver Ivanoviq, u vra në mëngjesin e djeshëm në hyrje të objektit të partisë së tij në Veri të Mitrovicës. Menjëherë pas sulmit ai është dërguar në qendrën spitalore, por pas disa minutash mjekët kanë konstatuar vdekjen e tij.