Arsyetimi qesharak i MZHE’së lidhur me mungesën e kontratës në gjuhën shqipe për Termocentralin

Ministria  e Zhvillimit Ekonomik-MZHE sot ka bërë publike kontratën komerciale të nënshkruar nga Qeveria e Kosovës dhe investitori “ContourGlobal” për projektin e TC ‘Kosova e Re’.

Ministri  Valdrin Lluka ka treguar se kanë arritur ta kompletojnë kontratën këtë javë me një 1 mijë faqe, e cila është publike për të gjithë të interesuarit edhe në mënyrë elektronike.

Por kontrata është publikuar vetëm në gjuhën angleze, jo edhe në atë shqipe duke e ditur që të interesuarit kryesorë mund të jenë kryesisht qytetarë të Kosovës.

Lidhur me këtë gjë, Periskopi ka kontaktuar edhe me zyrën e MZHE-së, prej të cilëve është thënë se kjo marrëveshje është ndërkombëtare dhe merr kohë të gjatë për ta përkthyer në shqip.

Këshilltarja për media në këtë ministri, Fitore Ajeti ka thënë se do të mundohen që kontratën ta kthejnë edhe në gjuhën shqipe, për shkak të kërkesave të mëdha.

Sipas Ajetit, një gjë e tillë do të marrë kohë 5 apo 6 muaj, për shkak të detajeve të shumta që janë në kontratën prej 1 mijë faqeve.

‘’Siç e dimë marrëveshja është ndërkombëtare dhe është nënshkruar në gjuhën angleze, prandaj çdo detaj për ta përkthyer, duhet një kohë e gjatë. Sidoqoftë, në bazë të kërkesave të mëdha do të mundohemi ta kthejmë edhe në gjuhën shqipe, edhe pse një gjë e tillë do të na marrë kohë 5 apo 6 muaj’’, ka thënë Ajeti për Periskopin.

Marrëveshja me kompaninë amerikane “Contour Global” kap vlerën mbi 1 miliard euro dhe konsiderohet si projekti më i madh në historinë e Kosovës.

Ajo u nënshkrua më 20 dhjetor të vitit të kaluar dhe parasheh investimin prej 1.3 miliard euro duke vënë në funksion njësinë e re prej 500 megavatësh brenda një periudhe katërvjeçare./Periskopi/

KËTU mund t’i shihni të gjitha kontratat e nënshkruara lidhur me projektin ‘Kosova e Re’.