Tunizia bën një hap revolucionar, propozon reformë radikale në martesë

Muajin e kaluar, presidenti Beji Caid Essebsi njoftoi synimin e tij për të lejuar gratë të martohen me persona që nuk i takojnë domosdoshmërisht besimit islam dhe t’u japin atyre të drejta të barabarta sipas trashëgimisë.

Aktualisht, një grua myslimane nuk lejohet të martohet me një jomysliman.

Burrave u lejohet të martohen me gra të çdo besimi të cilët nuk kanë nevojë të konvertohen.

Sipas ligjit Islam, burrat zakonisht marrin dyfishin e trashëgimisë se një grua, raportoi “The Guardian”, transmeton Periskopi.

Duke përmendur kushtetutën e vendit të vitit 2014, që konsiderohet si një nga më progresistët në rajon, presidenti tha: “Shteti është i detyruar të arrijë barazi të plotë midis grave dhe burrave dhe të sigurojë mundësi të barabarta për të gjitha përgjegjësitë që ata i kanë”.

Tunizia ka miratuar tashmë një ligj që i jep fund dhunës kundër grave, ku përfshihet heqja e një shtrëngimi në kodin penal që u lejonte përdhunuesve të grave që t’u martonin më pas me ato.

Duke folur në një radio lokale pak kohë pas njoftimit, Rym Mahjoub, një deputete me partinë liberale “Afek Tounes”, tha se masa ishte “progresive dhe revolucionare.”

Ajo shtoi: “Si grua jam krenare që kjo çështje do të diskutohet tani… kjo nuk do të thotë që nuk kemi probleme të tjera sociale dhe ekonomike dhe të anulojmë diskutimin e çështjeve të tjera të rëndësishme… por ne mund të shohim se disa gra janë të privuar nga e drejta e saj në trashëgimi siç është përcaktuar në tekstin fetar.”

Akademikja dhe feministja Dalenda Larguche nga Universiteti Manouba të Tunizisë tha se iniciativa e presidentit të vendit ishte kruciale për atë lloj shteti që ajo shpresonte Tunizia të bëhej në të ardhmen.

“Pse një burrë [tunizian] mund të martohet me një femër jo-muslimane, por ky nuk vlen për një grua tuniziane? Sa i përket çështjes së trashëgimisë, unë jam personalisht e kënaqur që presidenti mori vendimin për të shtyrë përpara me të gjitha masat drejt avancimit të barazisë”, u shpreh ajo.

“Sot nuk ka tabu. Me këtë Tunizi të re, ne jemi një shembull për botën arabe dhe një shembull për gratë e tjera dhe vendet myslimane. Nëse do të ishim në gjendje të krijojmë një kushtetutë progresive, kjo ishte falë grave tuniziane”, shtoi ajo.

Megjithatë, masa është përballur me rezistencë të fortë nga kundërshtarët e presidentit dhe nga disa organizma fetarë ndërkombëtarë./Periskopi/