A do ta shkarkojë Haradinaj ministrin Rikallo i cili po akuzohet se keqtrajtoi shqiptarët në luftë?

Ndaj ministrit i të ri të Bujqësisë, Nenad Rikalo,  menjëherë pas marrjes së postit, janë shfaqur një mori akuzash. Sipas banorëve në Kurriz të Dardanisë, ata akoma kujtojnë fytyrën e tij i cili vazhdimisht i kishte torturuar banorët shqiptarë .

E në lidhje me këtë, Periskopi ka kontaktuar me zyrtarin për media në qeverinë e Kosovës, Halil Matoshi, mirëpo ai nuk ka dashur t’i komentoj gjatë këto akuza të qytetarëve.

Në pyetjen se a janë duke e shqyrtuar këtë rast dhe a pritet ndonjë hap në lidhje me këto akuza,ai ka thënë se Qeveria Haradinaj nuk merret me interpretimin e shkrimeve të gazetave.

“Jo. Qeveria e Kosovës nuk merret me interpretimin e shkrimeve nëpër gazeta. Kjo është ccështje e instancave të shtetit dhe e qytetarëve dhe gazetave”,  u shpreh Matoshi.

Ministri i Bujqësisë në Qeverinë e Kosovës, Nenad Rikallo, po akuzohet për torturim të qytetarëve të Prishtinës gjatë kohës së luftës.

Banorët e ndërtesës në Kurriz të Dardanisë kanë rrëfyer për KTV-në torturat që thonë se Rikallo ka bërë dhe faktin që ai gjithmonë aty është shfaqur me uniformë dhe i armatosur.

Edhe pse kanë kaluar gati dy dekada, Fexhrije Beqiri mund ta kujtojë fytyrën e Nenad Rikallos, i emëruar ministër i Bujqësisë në qeverinë e Ramush Haradinajt.

Familja Beqiri jeton në katin e shtatë të kësaj ndërtesë në Kurriz të Dardanisë tash e disa dekada. Në katin e njëjtë, në numër 45, jetonte edhe Nenad Rikallo.

Gjithçka që mund të kujtojë zonja Beqiri nga Rikallo, atëherë i ri, janë torturat dhe maltretimet ndaj banorëve shqiptarë.

Djali i saj, Festimi, i ka të freskëta përjetimet për dy skena të torturave nga Rikallo, e njëra prej tyre përfshin edhe drejtimin e armës ndaj babait të tij, tashmë të ndjerë.

Në secilin kat të kësaj ndërtese ka banorë që kujtojnë tmerrin e përjetuar nga e gjithë familja Rikallo.

Ata që pranojnë të flasin e kujtojnë ta kenë parë ministrin e ri, gjithmonë në uniformë.

Banorët këtu janë shokuar kur e kanë parë Rikallon të jetë renditur në mesin e ministrave të qeverisë së re dhe kërkojnë largimin e tij të menjëhershëm.

Rikallo është pjesë e Listës Serbe dhe deri para pak kohësh ka shërbyer si anëtar i Komisionit Qendror të Zgjedhjeve./Periskopi/