Ramush Haradinaj uron Veselin, ka edhe disa fjalë për opozitën

Mandatari për formimin e Qeverisë nga koalicioni PAN, Ramush Haradinaj ka thënë se konstituimi i Kuvendit të Kosovës është lajm i mirë për vendin.

Në Facebook Haradinaj, duke e uruar Kadri Veselin për zgjedhjen kryetar Kuvendi, thotë se Kuvendi duhet të jetë arenë debatesh e ballafaqimesh të argumentuara mes shumicës dhe opozitës.

Ky është komenti i tij i plotë:

Konstituimi i Kuvendit të Kosovës, është një lajm i mirë për vendin. Për më tepër është një zhvillim pozitiv në përmbylljen e procesit të krijimit të institucioneve të Republikës së Kosovës, të dala nga zgjedhjet e qershorit 2017.

Unë besoj fuqishëm që Parlamenti i Kosovës, do të jetë një arenë debatesh dhe ballafaqimi të argumentuar, ndërmjet shumicës parlamentare dhe opozitës. Poashtu jam i bindur se Parlamenti i Kosovës, do të jetë institucioni që do të luaj rol vendimtar në zgjidhjen e çështjeve jetike për vendin, duke shpresuar se deputetët do të jenë unik, posaçërisht në temat e interesit nacional shtetëror.

Kryetarit të Kuvendit, zotit Kadri Veseli dhe të gjithë nënkryetarëve, iu uroj sukses në detyrën që kanë marrë, i bindur se puna dhe përgjegjësitë e tyre do të jenë në pëputhje të plotë më demokracinë parlamentare në vend.

RH