PDK zvogëlohet edhe më shumë, rritet LDK

Aleanca Kosova e Re e Pacollit e braktisi koalicionin me LDK-në dhe Alternativën, të formuar para zgjedhjeve të 11 qershorit, për t’iu bashkuar pak orë më vonë koalicionit tjetër PAN.

Me vetëm 4 deputetë, partia e Pacollit do të marrë pozita të larta në Qeverinë që mund të formohet ditëve të ardhshme.

Dje në media është përfolur se vetë Pacolli mund të marrë postin e zëvendëskryeministrit të parë si dhe të ministrit të Jashtëm.

Nëse ndodh kjo, Behgjet Pacolli do të heqë dorë nga pozita e deputetit, sepse kështu e kërkon Ligji për Deputetët.

Për mundësinë që partitë të humbin deputetë nëse ata të zgjedhurit marrin poste qeveritare KALLXO.com kishte shkruar qysh në muajin maj.

Nnë rast se Pacolli merr pozitë në Qeveri atëherë do të lirohej një pozitë e deputetit, e këtë pozitë nuk e merr kandidati i partisë së njëjtë por kandidati me më së shumti vota i koalicionit.

Në rastin konkret, kandidati më i votuar në listën e pritjes është nga radhët e Lidhjes Demokratike të Kosovës, ministri në detyrë i Shëndetësisë, Imet Rrahmani, i cili ka 7 mijë e 272 vota.

Në këtë mënyrë, LDK do të ketë 24 deputetë dhe PDK do të kalonte në pozitën e tretë me 23 deputetë, prapa Vetëvendosjes, e cila ka 32 deputetë.

Atëherë AKR-ja do të mbetej vetëm me 3 deputetë: Labinot Tahirin, Islam Pacollin dhe Korab Sejdiun.

Ky i fundit ka deklaruar disa herë se nuk do e votojë asnjëherë koalicionin PAN për krijimin e institucioneve.

KALLXO.com ka provuar të kontaktoj me deputetin Sejdiu, i cili është edhe nënkryetar i AKR-së, por ai nuk është përgjigjur.

Sipas marrëveshjes së nënshkruar dje me koalicionin PAN, AKR do ta ketë pozitën e zëvendëskryeministrit të parë si dhe do të drejtojë këto 5 ministri: Ministrinë e Punëve të Jashtme, Ministrinë e Punëve të Brendshme, Ministrinë e Zhvillimit Ekonomik, Ministrinë e Bujqësisë dhe Ministrinë e Planifikimit Hapësinor.