Ky kryetar partie po e kërkon shkarkimin e ministrit Rikalo ose rrëzimin e qeverisë Haradinaj

Kryetari i Partisë Fjala, Gëzim Kelmendi, ka kërkuar të shkarkohet Ministri i ri i Bujqësisë, Pylltarisë dhe Zhvillimit Rural, Nenad Rikalo, ose të rrëzohet qeveria.

Ai ka kërkuar nga opozita VV-LDK, se nëse nuk bëhet shkarkimi i ministrit, të rrëzohet qeveria, pasi siç thotë ai, edhe ashtu qeveria nuk është e sigurt me 61 vota.

Kërkesa e Kelmendit:

Ose të shkarkohet ministri Nenad Rikalo ose të rrëzohet qeveria !

Ministri i bujqësisë në Qeverinë e Republikës së Kosovës Nenad Rikalo duhet shkarkuar menjëherë.

Mbi të po rëndojnë akuza për torturim të shqiptarëve gjatë luftës në Kosovë.

Për krimet e tij po dëshmojnë dhjetëra qytetarë të Kosovës.

Nëse këto dëshmi nuk merren për bazë, atëherë çka duhet që një person të shpallet fajtor.

Rasti Rikalo është “test” edhe për qeverinë por edhe për opozitën.

Si qeveria ashtu edhe opozita duhet të tregojnë se më e rëndësishme është jeta dhe dinjiteti i qytetarëve të Kosovës, se sa karrika dhe pushteti i tyre.

Nëse Nenad Rikalo vazhdon të mbetet ministër në këtë qeveri, atëherë edhe kjo qeveri mbanë përgjegjësi për krimet që ky ministër i ka bërë në kohën e Millosheviqit.

Kryeministër Haradinaj,

Koalicioni PAN-AKR,

Vetëvendosje dhe LDK, dëshmoni se e doni popullin dhe Kosovën më shumë se xhepat e juaja.

Ju opozitë VV dhe LDK, nëse nuk shkarkohet ministri, shkarkojeni qeverinë.

Kurë ma lehtë se sot nuk e keni ta rrëzoni qeverinë. Kjo qeveri nuk i ka të sigurta 61 vota.

Veproni, mos të iu dhimbset “karrika”.