“Këta dy persona të gjejnë zgjidhje për krijimin e Ushtrisë”

Eksperti i çështjeve ushtarake, Ramadan Qehaja ka thënë se për transformimin e FSK-së në Forca të Armatosura të Kosovës duhet bërë më shumë trysni tek Lista Serbe. Megjithatë, ai është shprehur skeptik në reflektimin e këtyre të fundit për Ushtrinë e Kosovës.

“Ne kemi menduar që deri në fund të këtij viti, çështja e formimit të FAK-ut do të përmbyllet në favorin tonë sipas kërkesave ushtarake të Republikës së Kosovës. Mirëpo pas kësaj që u formua Qeveria me bekimin e Listës Serbe, kujtoj se do të komplikohet çështja e formimit të FAK-ut dhe kjo për ne nuk është situatë e volitshme, përkundrazi, kjo nuk duhet të lejohet. Kujtoj se me planin politik dhe diplomatik duhet të bëhet një trysni në mënyrë që Lista Serbe ta pranojë këtë çështje. Por a do e pranojnë ata apo jo, këtë nuk e di, edhe pse jam personalisht skeptik për këtë”, është shprehur ai.

Qehaja ka kujtuar armatimin që Serbia e ka siguruar nga Rusia, duke shtuar se Kosova në këtë drejtim është në pikën 0 pa Ushtrinë e saj.Sipas tij, presidenti Hashim Thaçi dhe kryeministri Ramush Haradinaj duhet që me plan politik dhe diplomatik ta zgjidhin këtë çështje.

“Estabilishmenti ynë politik duhet ta ketë parasysh edhe një element, deri sa Serbia fqinje çdo ditë e më tepër po armatoset me armatim ofensiv, nga prodhimi rus, ne në fakt jemi në pikën zero sa i përket formimit të Ushtrisë. Kjo do të thotë që ne nuk jemi duke ndërmarrë masa vetmbrojtëse si shtet që jemi në formim e sipër. Ky është elementi kryesor që duhet kryeministri Haradinaj dhe presidenti i vendit të gjejnë zgjidhje politike dhe diplomatike lidhur me këtë çështje”, ka thënë ai për “Indeksonline”.

Qehaja ka përfunduar se Kosova nuk mund të quhet shtet funksional dhe i formësuar, pa pasur Ushtrinë e saj si shtyllë kryesore të sigurisë.