Gaxheri flet për ministrin Rikallo, ja çfarë thotë se duhet bërë

E kaluara e ministrit të Bujqësisë, Nenad Rikallo, ka nxitur reagime të shumta në vend. Ministri serb po akuzohet se gjatë periudhës së luftës i kishte torturuar disa banorë të Prishtinës, respektivisht ata të lagjes “Dardania” në Kurriz.

Pas shumë reagimeve, edhe Lidhja Demokratike e Kosovës ka kërkuar dorëheqjen e Rikallos. Deputetja e kësaj partie, Besa Gaxherri ka thënë se në rast se ministri ka qenë pjesë e luftës ai duhet urgjentisht të shkarkohet.

Tutje, ajo thotë se çfarëdo krimi gjatë luftës që është bërë duhet të bëhet kallëzimi penal.

“Në qoftë se Ministri në fjalë, kemi të dhëna të sakta që ka qenë pjesë e luftës dhe ka shkaktu çfarëdo lloj dhune mbi  këndo qoftë, natyrisht që ai duhet  urgjentisht jo vetëm të shkarkohet. Por ata që e kanë qartësu këtë lajm duhet të gjejnë njerëzit e njohur dhe që janë dëshmitar që ka shkaktu ai dhunë ose çfarëdo krimi gjatë luftës dhe natyrisht që duhet të bëhet kallëzimi penal”, ka thënë Gaxheri për ‘Indeksonline’.

Mirëpo, ajo ka theksuar se nuk është kundër asaj që ministër i Bujqësisë të jetë një serb. Gaxheri thotë se në qeverinë “Haradinaj” mund të ketë edhe ministra shqiptarë që duhet t’ju shikohet Cv-ja e tyre.

“ Unë nuk do të jam kurrë për me përqëndru në gjueti shtrigash askënd dhe as më pak se është ministër serb sepse në këtë përbërje të qeverisë mund të ketë edhe ministra shqiptarë që duhet të shikohen, e me marrë të dhëna për secilin për CV-në e tyre por  natyrisht që është shumë e ndjeshme çështja mes popullit serb dhe popullit shqiptar që vërtet kanë ndodhur gjëra të tmerrshme prandaj duhet ata që vërtet e njohim ndoshta me pas padi në prokurori dhe me u marrë çështja shumë serioze”, ka përfunduar ajo./Indeksonline/Ardian Beka/