Franca e gatshme që ta mbështesë Kosovën në të gjitha fushat

Ministri i Zhvillimit Ekonomik, Valdrin Lluka, gjatë një takimi me ambasadorin e Francës në Prishtinë, Didier Chabert, ka thënë se zhvillimi i sektorëve strategjikë është nevojë imediate për zhvillim stabil ekonomik.

Kreu i MZHE-së ka theksuar se zhvillimi i sektorëve si energjia dhe minierat do të jenë fokus i punës së tij, derisa ka shtuar se vëmendje e rëndësishme do t’i kushtohet edhe ndërmarrjeve publike me qëllim të përmirësimit të shërbimeve ndaj qytetarëve. Ministri Lluka ka vënë në dukje se projektet që janë në proces të realizimit siç është TC Kosova e Re dhe projektet tjera do të kenë një dinamikë të shtuar të realizimit.

Gjithashtu, u diskutua edhe për projektin për trajtimin e ujërave të zeza, me vlerë rreth 86 milionë euro që financohet nga Qeveria e Francës, për të cilin ministri Lluka e siguroi diplomatin francez se së shpejti do të krijohet njësia që do të merret me implementimin e tij.

Në takim është diskutuar edhe për zhvillimin e Trepçës dhe promovimin e projekteve në sektorët sektorin e energjisë, minierave etj. Ministri Lluka dhe ambasadori Chabert kanë vlerësuar lart marrëdhëniet mes dy vendeve, ndërsa u theksua se Franca edhe në të ardhmen do të vazhdojë të mbështesë Kosovën në të gjitha fushat.