2 orë më parëEdi Rama flet para gjeneralëve të NATO-s për rrezikun rus
Periskopi(9 vite më parë)
(9 vite më parë)Kryeministri Edi Rama ka folur sot para shefave të shtabeve të vendeve të NATO-s për rrezikun rus në rajon. Ai numëroi disa vende në rajon që janë jashtë NATO-s duke përbërë një faktor paqartësie për Aleancën dhe territor ku mund të depërtojnë faktorë të tretë. Kryeministri theksoi se Shqipëria si një vend që kufizohet […]
Kryeministri Edi Rama ka folur sot para shefave të shtabeve të vendeve të NATO-s për rrezikun rus në rajon. Ai numëroi disa vende në rajon që janë jashtë NATO-s duke përbërë një faktor paqartësie për Aleancën dhe territor ku mund të depërtojnë faktorë të tretë.
Kryeministri theksoi se Shqipëria si një vend që kufizohet apo ndërvepron në shumë mënyra me këto vende, ka një interes por edhe një përgjegjësi të veçantë që kjo pjesë organike e rajonit të shndërrohet edhe në një faktor të qëndrueshmërisë.
“Edhe në të ardhmen ne do të japim kontributin tonë për realizimin e spektrit të gjerë të angazhimeve të NATO-s. Një ndër përgjegjësitë e rëndësishme të Shqipërisë në NATO është kujdesi i saj për të kontribuuar që rajoni historik i brishtë dhe problematik i Ballkanit të shndërrohet në një rajon të paqes, demokracisë, stabilitetit dhe prosperitetit.
Me hyrjen e Malit të Zi në NATO, gjë të cilën Shqipëria e ka mbështetur fuqimisht që në krye të herës, Aleanca jonë përveçse atlantike u bë plotësisht edhe në thonjëza Adriatike.
Tashmë deti Adriatik është shndërruar në një det të brendshëm për Aleancën duke i dhënë asaj kontrollin mbi një aset maritim shumë të rëndësishëm për sigurinë evropiane. Megjithatë hartës së NATO-s i mungojnë Bosnje Hercegovina, Serbia, Kosova dhe Maqedonia.
Kjo zonë ende e papërfshirë organikisht në arkitekturën e sigurisë evropiane përbën një faktor paqartësie strategjike për Aleancën tonë ashtu sikundër edhe një territor ku aktorë të tretë shohin vulnerabilitet dhe mundësi për penetrim.
Shqipëria si një vend që kufizohet apo ndërvepron në shumë mënyra me këto vende, ka një interes por edhe një përgjegjësi të veçantë që kjo pjesë organike e rajonit dhe e kontinentit tonë të shndërrohet edhe në një faktor të qëndrueshmërisë dhe prosperitetit të tij.
Në përmbushje të kësaj përgjegjësie edhe si vend i NATO-s ne jemi përpjekur dhe kemi arritur besoj jo pak në një proces që vazhdon”, deklaroi kryeministri Edi Rama në komitetin e NATO-s që u mblodh për herë të parë në Shqipëri.
