Thellohet bashkëpunimi shqiptaro-serb, krijohet edhe Oda Ekonomike Shqiptaro – Serbe

Sipas Çadezh, rritja mund të matet me rritjen e numrit të anëtarëve të dhomave dypalëshe të tregtisë, bashkëpunimit në mes bizneseve dhe formimit të ndërmarrjeve të përbashkëta.

“Në vit e gjysmë, prej kur është mbajtur takimi i madh në Nish, prej atëherë nuk ka muaj që nuk takohemi me ndonjë delegacion biznesmenësh në Tiranë, apo me kolegët tanë nga Shqipëria në Serbi,” tha për gazetarët Çadezh në Durrës, gjatë takimit një ditor të gjashtës së Ballkanit Perëndimor.

Çadezh me këtë rast njoftoi se në nëntor një delegacion i madh i biznesmenëve serbë do të marrë pjesë në Panairin Tregtar në Tiranë, ku edhe do të mbahet kuvendi i parë i Odës Dypalëshe Ekonomike Shqiptaro – Serbe.

“Ne tashmë kemi një numër të konsideruar të anëtarëve të cilët kanë nënshkruar, dhe raportohet se plotë të tjerë janë të interesuar që të anëtarësohen në Odat E Përziera Tregtare shqiptaro-serbe. Ne rezultatet tona i masim me shifra, dhe po shohim që ka një rritje të vazhdueshme të shkëmbimeve tregtare në mes të Shqipërisë dhe Serbisë”, ka shtuar Çadezh duke vënë në dukje se tregtia është vetëm fillimi i një bashkëpunimi më të madh që duhet të ndodh në të ardhmen.

“Ka nisur edhe formimi i ndërmarrjeve të përbashkëta shqiptaro-serbe. Një e tillë është themeluar kohët e fundit në Tiranë, në mes të” Milanovic Inginering”dhe “Grupi Delia” nga Shqipëria që kanë të bëjnë me projektet e trajtimit të ujërave të zeza, pompa dhe projekte të ujit,” tregon Çadezh.

Ai tha se ka edhe projekte të tjera të mëdha të përbashkëta, ndër të cilat është shembulli i një korporatë të madhe shqiptare dhe ndërmarrjeve serbe që janë në proces të hapjes së një biznesi të madh të shpërndarjes së produkteve në Shqipëri. “Këto janë gjëra konkrete dhe të kontraktuara “, përfundoi Çadezh./Periskopi/