PDK-ja në krizën më të thellë që prej themelimit, këto janë planet e saj nëse dështon me numrat

Partia Demokratike e Kosovës, tash e treta në vend për nga fuqia elektorale pas zgjedhjeve të 11 qershorit, është duke kaluar kohën më të vështirë prej themelimit të saj.

Partia që u drejtua nga Hashim Thaçi për vite të tëra, duket se ka marrë tatëpjetën me ardhjen e Kadri Veselit në krye të saj.

Jo vetëm në nivelin qendror, edhe nëpër komuna, e sidomos në bastionet e saj, Skenderaj e Drenas, PDK po kalon një periudhë të vështirë për shkak të mospajtimeve e rivaliteteve të ashpra mes zyrtarëve të partisë.

Nëse rikandidon për kryetar të Skenderajt Sami Lushtaku, garës ka paralajmëruar t’i hyjë edhe Bekim Jashari. Tërheqja e Lushtakut duket se është e pamundur dhe për këtë ai ka mbështetjen edhe të partisë. Në Drenas priten përçarje për shkak të kundërshtimit të Ramiz Lladrovcit nga anëtarët e partisë, prandaj pritet që nga PDK-ja të dalin disa kandidatë të pavarur për kryetar komune.

Në anën tjetër bashkëpunimi i PDK-së me AAK-në dhe Nismën, duket se nuk po shkon aq mirë, dhe siç raportoi edhe më herët Periskopi, PDK-ja më nuk është e sigurt nëse e do Haradinajn në krye të Qeverisë.

Përpos kësaj, koalicioni i brishtë nuk po i siguron dot as numrat për të krijuar Qeverinë e re dhe për të zgjedhur Kadri Veselin kryekuvendar.

Periskopi kupton se si pasojë e mungesës së numrave, PAN-i është duke pritur që të përfundojë ultimatumi dhjetëditor i Behgjet Pacollit ndaj VV-së e LDK-së, në mënyrë që të shqyrtohet mundësia për bashkëpunim me AKR-në.

Përndryshe, ky burim thotë se, nëse dështon bashkëpunimi me AKR-në, PAN-i nuk do të provojë më që të bindë individualisht deputetët, por do të provojë që ta çoj vendin në zgjedhje të reja.

Problem tjetër për PAN-in sipas po këtij burimit është kandidati për kryeministër, Ramush Haradinaj, i cili konsiderohet i papranueshëm për ndërkombëtarët.  /Periskopi/