Pacolli i dëshpëruar me LAA-në e VV-në: Ja çfarë më ofroi Albin Kurti

Presidenti i AKR-së, Behgjet Pacolli ka thënë se do të qëndroj në koalicionin LAA, edhe pse thotë se është trajtuar pa respekt nga LDK-ja. Ai ka thënë se jobashkëpunuese është treguar EDHE Vetëvendosje.

Po ashtu, Pacolli tha se është gabim i PAN-it që të thirret në numrat e AKR-së, raporton Periskopi.

“M’u thirrë në numrat e AKR-së është gabim dhe ka qenë gabim. AKR-ja ka qenë, është dhe më tutje mbetet në koalicionin me LDK-në dhe Alternativën. Kisha dashtë që të ketë më shumë bashkëpunim në këtë koalicion. Disi jemi anashkalu. Keni pa që vetëm AKR-ja s’ka dalë me kandidatë, se kemi besu në një premtim e parimi që në zgjedhjet lokale do të kemi një platformë të përbashkët”, theksoi Pacolli.

Vetëvendosje sipas tij është treguar jokorrekte me AKR-në po ashtu, duke thënë se Albin Kurti i ka ofruar vetëm një opsion partisë së tij.

“Edhe VV ka refuzu cdo bashkëpunim me ARK-në në këtë drejtim. AKR-së iu la vetëm një opsion, të shkrihet në Vetëvendosje. Kjo është jokorrekte. Nuk jam njeri që kërkon lëmoshë, dhe nuk do ta bëj këtë”, tha ai.

Ai tha se në koalicionin me LDK-në ndjehet vetëm numër, duke e akuzuar për mosbashkëpunim.

“As në LDK askush nuk na ka pyet se cka do të bëhet. Jam aty do të qëndroj aty, por jam një numër praktikisht, atë që nuk kisha dashtë të jem. Kërkoj bashkëpunëtorë që të bashkëpunoj. Nuk jam njeri i pasivitetit. Unë çdo kund kalkuloj që kohën time ta shfrytëzoj për krijimtari, për vepra”, tha ai. /Periskopi/