Nitaj i AAK-së ka një kërkesë për Isa Mustafën

Kandidati i Aleancës për Ardhmërinë e Kosovës për deputet, Muharrem Nitaj i ka kërkuar kryeministrit Isa Mustafa, që vetëm njëherë të bëhet i sinqertë dhe të thotë një emër të një zyrtari të vetëm të AAK-së që është instaluar në institucione apo që është në pushtet.

Postimi i plotë i Nitajt:

Kryeministër, edhe humbja e ka një farë dinjiteti

Kryeministri akoma në detyrë, Isa Mustafa, paska shkruar se “PDK-së, AAK-së e Nismës iu rrezikohej kapja e shtetit nga njerëzit që i kanë të instaluar në institucione”. Isa Mustafa, bëhuni njëherë i sinqertë dhe thuajeni vetëm një emër të një zyrtari të vetëm të AAK-së që është “instaluar” në institucione apo që është në pushtet.  Ju e dini që AAK ka qenë në opozitë qe tri mandate dhe nuk ka qenë AAK-ja ajo që i ka pushtuar bordet e agjensitë, universitetet shërbimet diplomatike, e deri te ministritë, siç po bëhët edhe në këto grahmat e fundit të qeverisë suaj!  Ne e kuptojmë që jeni me vaj në buzë, por edhe humbja e ka njëfarë dinjiteti.