Ndryshon situata, AKR-ja sërish i kthehet LDK-së – kjo është deklarata e fundit e Mustafës

Kryetari i Lidhjes Demokratike të Kosovës, Isa Mustafa, thotë se LDK-ja, AKR-ja e Alternativa kanë koalicionin të fuqishëm si në ditët e fillimit të tij, përkundër deklaratave të fundit të kryetarit të AKR-së, Behgjet Pacolli dhe takimeve të tij me protagonistë të PAN-it.

Në Facebook, Mustafa shkruan se asgjë nuk ka ndryshuar në këtë koalicion, duke thënë se koalicioni do të jetë unik edhe në zgjedhjet lokale, shkruan Periskopi.

Këtë bindje, Mustafa thotë se e ka marrë nga takimi i sotshëm me Behgjet Pacollin.

Shkrimi i plotë i Mustafës:

Koalicioni i LDK-së me AKR-në si dhe me Alternativën është i fortë sa në ditët e fillimit të tij. Qëndrimet e shprehura për tu krijuar qeveria e vendit, janë shprehje e orientimeve shtetformuese të partnerëve tanë dhe këtë LDK nuk e kupton si orientim për thyerje të marrëveshjes së koaliconit dhe perspektivës sonë të përbashkët strategjike.

LDK, jo vetëm në nivel parlamentar por edhe në zgjedhje lokale do të bashkëpunoj ngushtë me AKR-në në shumë komuna si dhe me Alternativën, atje ku gjejmë interes të përbashkët. Besoj shumë një njerëzit e AKR-së dhe në kompetencën e tyre për qeverisje. Sikurse që besoj se Alternativa do të jetë vlerë shtuese e demokracisë sonë. Ne ndajmë orientime dhe synime të përbashkëtë për vendin, krijojmë sinegji për suksese që i nevojiten Kosovës. Këtë bindje e kisha edhe sot nga takimi miqësor me z. Behgjet Pacoli.