LDK’së i shkon edhe një vërejtje nga AKR, lidhet me emrin e Kujtim Shalës për nënkryetar Kuvendi

Paralajmërimi se Kujtim Shala nga Lidhja Demokratike e Kosovës do të jetë propozim i kësaj partie për nënkryetar të Kuvendit nuk po i pëlqen aspak Aleancës Kosova e Re.

Partia e Behgjet Pacollit po i kërkon partnerit të madh në koalicion qe propozimet për emra t’i bëjë publik vetëm pas diskutimeve me AKR-në dhe jo krye në vete.

Fatmir Matoshi nga kjo parti ka thënë se LDK po gabon qe po i nxjerr në publik propozimet e veta pa i diskutuar brenda koalicionit.

“Emri i Shalës mund të jetë propozim i LDK-së, por deri me tash me neve nuk është diskutuar emri i tij. LDK po ngutet dhe po gabon qe po nxjerrë në publik propozimet e veta pa i diskutuar brenda koalicionit”, ka thënë Matoshi për ‘Indeksonline’.

Nëse kjo zyrtarizohet, atëherë ai paralajmëron se AKR do ta diskutojë seriozisht ketë çështje.

“Ne deri më tani nuk kemi ndonjë informate ose kërkese prej LDK qe Shala me qenë nënkryetar. LDK duhet të mendoj se a është në koalicion me neve ose jo. Ata duhet të reflektojnë. Sepse koalicioni i ka disa rregulla”, ka shtuar Matoshi.

Nëse, LDK vazhdon kështu, atëherë zyrtari i AKR-së, ka paralajmëruar se edhe ata mund të ndërmarrim veprime tjera duke mos specifikuar se çfarë veprimesh.

Lidhja Demokratike e Kosovës tanimë e ka zyrtarizuar si shef të Grupit Parlamentar, Avdullah Hotin. Poashtu është raportuar në media se deputeti Kujtim Shala do të jetë nënkryetar i Kuvendit.