Ky është kandidati i PDK-së për kryetar të Komunës së Kamenicës që kishte ‘vjedhur’ veturën e shtetit (Foto)

Sipas raportit të vitit 2014 nga Zyra e Auditorit Gjeneral, Krasniqi që shërbente asokohe si zëvendësministër në Ministrinë e Infrastrukturës, e kishte përdorur jashtëligjshëm veturën zyrtare për katër muaj. Ai e kishte mbajtur veturën e shtetit edhe pas përfundimit të mandatit të tij si zv/ministër.

“Vetura zyrtare 3Z-009-08 në mandatin e kaluar qeverisës ka qenë në shfrytëzim nga zëvendës ministri. Kjo veturë është dashur të kthehet në ministri me rastin e përfundimit të mandatit në dhjetor 2014. Sipas zyrtarit përgjegjës në ministri, vetura është rikthyer në muajin prill 2015”, thuhej në raportin e auditorit.

Ndërkaq, sipas po të njëjtit raport të Auditorit të Përgjithshëm, Krasniqi gjatë kësaj kohe kishte arritur t’i shpenzonte më shumë se 3 mijë e 700 euro, raporton Insajderi.

“Ne kemi testuar faturat për karburante dhe kemi identifikuar se për muajt dhjetor 2014, janar, shkurt dhe mars 2015 kanë ndodhur shpenzimet në mënyrë jo të rregullt. Vlera totale e furnizimit për këtë periudhë është 3,745€”, sqarohej më tej në raportin e auditorit.

Krasniqi ka arritur të fitojë besimin e Degës së PDK-së në Kamenicë që të kandidohet për kryetar të komunës së Kamenicës, duke e mposhtur kryetarin aktual të kësaj komune Begzad Sinani.

Begzad Sinani, si kandidat i Partisë Demokratike të Kosovës kishte fituar dy mandate për të qenë kryetar i komunës së Kamenicës.