Kandidati i LDK-së për Prizrenin – Hatim Baxhaku apo Driton Selmanaj?

Lidhja Demokratike e Kosovës ende nuk e ka vendosur përfundimisht se me kë do të garojë për zgjedhjet lokale të tetorit në Komunën e Prizrenit.

Dy emrat kryesorë që po përmenden janë, ish-deputeti Hatim Baxhaku dhe deputeti i ri i LDK-së, Driton Selmanaj.

Për këtë çështje LDK-ja është mbledhur të mërkurën në mbrëmje për të debatuar se për cilin nga këta të dy do të vendosin përfundimisht.

Kryetari i LDK-së, Isa Mustafa, i ka thënë Klan Kosovës pas takimit, se për shkak të rëndësisë së kësaj komune, njëjtë sikur në Prishtinë, ende nuk kanë vendosur për kandidatin.

“Në këtë takim janë diskutuar disa emra për pretendentë për kryetar të Prizrenit, kryesorët Hatim Baxhaku dhe Driton Selmanajt”, ka thënë Mustafa, njofton Klan Kosova.

Ndërsa vet Driton Selmanaj, duke folur për këtë çështje në Info Magazine të Klan Kosovës, ka deklaruar se ai ende nuk e di se si do të vendos LDK, porse do të ishte i gatshëm ta marrë këtë detyrë nëse ia cakton partia.

“Unë jam i gatshëm nëse kërkohet nga unë, nuk u iki përgjegjësive”.

Kurse, Haxhi Avdyli nga LDK, në një intervistë për Klanin, pohoi se për Baxhakun ka një mbështetje të madhe, porse edhe ata që kanë ide të tjera kanë vendosur t’i dëgjojnë para se të marrin vendimin final.

“Mbi 95 për qind kanë dhënë përkrahje për Hatim Baxhakun”, pohoi Avdyli.

“Baxhaku ka përkrahej edhe të degës së LDK-së në Prizren. Është i respektuar si mjek dhe si politikan në këtë komunë”.