Dënohet me burg ish-drejtoresha e Inspektoratit në Drenas, thotë se vendimi ishte politik

Xhemajlaj – Thaçi, i tha “Gazeta Blic” se ajo kishte qenë caku i drejtësië, pavarësisht asaj që thotë t’i ketë respektuar të gjitha procedurat për ndërprerjen e punimeve në objektin ku është bërë ai mbindërtim.

“Vendimi është politik ngase për këtë mbindërtim kemi zhvilluar të gjitha procedurat, procesverbal dhe aktvendim për ndërprerje të punimeve dhe kemi vendosur shiritin si shenjë zyrtare, madje përmes avokatit komunal kemi bërë kallëzim penal dhe rasti është dërguar në gjykatë në Drenas, pastaj për këtë rast është zhvilluar një proces gjyqësor madje ekziston edhe vendimi i formës së prerë”, deklaroi ajo.

Tani, kur asaj dhe Halim Vrellakut i cili po e kryente detyrën e shefit të Inspektoratit në këtë komunë, Gjykata Themelore ia ka shqiptuar dënimin, hedh dilema mbi fajësinë e punëkryesve të cilët u deklaruan të pafajshëm.

“Shtrohet pyetja si mund të lirohet ndërtuesi dhe të dënohemi ne. Vlenë të theksohet se në këtë rast nuk ka palë të dëmtuar sepse me ligjet në fuqi pronarë janë vetë banorët”, ka thënë Xhemajlaj-Thaçi.

“Gazeta Blic” ka arritur të sigurojë në kopje fizike vendimin e vitit 2016 të Gjykatës Themelore në Prishtinë dega në Gllogovc lidhur me rastin në fjalë.

Sipas aktakuzës, Izet Kukaj, pronari i kompanisë “Elita-A” gjatë qershorit të vitit 2013 në bllokun banesor numër V të Komunës së Drenasit pa leje dhe në mënyrë të kundërligjshme ndërtoi një kat në nënkulm me gjithsej 14 banesa që kishin sipërfaqe 1800 metra katrorë.

Aktakuza precizonte se 13 nga këto banesa Izet Kukaj i ka shitur në shumën prej 252 mijë eurove, ndërsa njërën nga to e ka ndalur për vete.

Sipas aktakuzës, njërën nga banesat e mbindërtimit ilegal në objektin banesor të Drenasit e bleu vëllai i të akuzuarës Hyrije Xhemajlaj-Thaçi, Isa i cili në zgjedhjet e parakohshme lokale në Drenas ka garuar për kryetar të kësaj komune nga radhët e NISMA-s.

Ai i ka thënë “Gazeta Blic” se banesën e ka blerë pasi që kompania ELTA-A ia ka prezantuar pëlqimin nga Komuna e Drenasit.

“Unë Isa Xhemajlaj deklaroj se asnjëherë në jetën time nuk kam ra ndësh me ligjin dhe kjo është shumë lehtë e verifikueshme në organet e drejtësisë“, ka deklaruar ai.

Më poshtë mund të gjeni pëlqimin e lëshuar nga Komuna e Drenasit në atë kohë për mbindërtimin në objektë, të cilin ka arritur ta sigurojë “Gazeta Blic”.