Vazhdon saga e Enver Hoxhajt si lexues i apasionuar: Kërkoj ballafaqim me filozofë (Video)

Ministri i Punëve të Jashtme në ikje, Enver Hoxhaj pas disa publikimeve në llogarinë e tij në Facebook ku tregon se cilat libra po i lexon, ka treguar edhe publikisht pasionin e tij të leximit.

Në “Rubikon” Hoxhaj është mburrur se është një lexues i pasionuar.

“Gjatë muajit lexoj ndoshta, mund të përfundoj 2-3 libra”, ka thënë Hoxhaj.

Madje ai ka thënë se librat që lexon janë edhe voluminoz.

“Realisht libri i Kissingerit është 800 faqe por e kam lexuar me pasion”, ka thënë ai.

Ai ka komentuar Henry Kissingerin një nga diplomatët e njohur duke e quajtur një “fenomen në politikën e jashtme, si mendim”.

Hoxhaj ka treguar se është i dhënë pas leximit të filozofisë gjermane duke e quajtur si filozof të preferuar  Jürgen Habermas gjë që e ka ndihmuar të “çlodhet dhe të motivohet për të vazhduar tutje”.

“Haberman është filozofi im i preferuar edhe për tezat e patriorizmit”, ka thënë Hoxhaj.

Ai ka treguar edhe arsyen pse i publikon në Facebook, librat që i lexon duke i shoqëruar edhe me nga një fotografi ku ai shihet duke lexuar.

“Po mendoja se mund të provokoja ndonjë debat në shoqëri”, ka thënë ministri në ikje i Punëve të Jashtme.

Në fund ka pasur edhe një kërkesë për KTV-në, ku transmetohet “Rubikon”.

“Kam dëgjuar që ju e keni një emision për libra dhe mirë është të ftohem të flas për libra dhe kisha pas qejf të ballafaqohem edhe me këta të filozofisë….”, ka thënë Hoxhaj.

Por ka pasur një kusht.

“…. nëse e njohin gjuhën gjermane, sepse Habermasi mund të lexohet edhe në gjuhë të tjera, por mënyra e shkrimit të tij në gjuhën gjermane është e veçantë”, ka thënë Hoxhaj.

E autori i emisionit Adriatik Kelmendi i ka premtuar se do të “intervenoj” që Hoxhaj të jetë i ftuar në emision televiziv për të folur për libra./Insajderi.com