“Nëse Teuta votoi Thaçin për president, pse jo Haradinajn për kryeministër”

Klan Kosova ka kuptuar që pos një raporti të veçantë, të mëhershëm, të liderit të AAK-së me ish-presidentin Ibrahim Rugova, që pati kulmuar me një akord për bashkëqeverisje më 2004, ku i pari u bë shef qeverie, e i dyti president vendi, ka qenë edhe një lloj “hakmarrje” që e ka shtyrë vajzën e ish-kryetarit ta mbështesë Haradinajn.

E kjo ka të bëjë me “detyrimin” që i ishte bërë Teuta Rugovës, më 2014, nga kryetari i LDK-së, Isa Mustafa, për ta votuar marrëveshjen e këtij të fundit, me Hashim Thaçin e PDK-së.

Ky i fundit, sipas akordit në fjalë, do të bëhej president, më 2016, gjë qe edhe ndodhi, më përkrahjen e madhe të deputetëve të LDK-së, ndërsa Mustafa fitoi postin e kryeministrit.

“Nëse Teuta u desh të votojë Kadri Veselin për kryetar parlamenti dhe Hashim Thaçin për president të shtetit, më vonë, pse të mos e mbështesë tash edhe Ramush Haradinajn për kryeministër”, ka thënë një burim i Klan Kosovës, i afërt me zhvillimet e sotme në shtëpinë e presidentit të ndjerë.

“Të paktën, presidenti Rugova ka patur një raport më të mirë me Haradinajn, sesa me Thaçin”.