Kujt i takon që ta thërrasë mbledhjen e parë konstituive? Flet Presidenca

Presidenca e Kosovës në një përgjigjeje për lajmi.net, ka thënë se Presidenti do ti respektojë të gjitha afatet ligjore dhe kushtetuese për krijimin e institucioneve të reja, kur janë pyetur nëse Presidenti do të thërras këtë mbledhje për seancën konstituive.

“Presidenti i Republikës së Kosovës, Hashim Thaçi, do të respektojë të gjitha afatet ligjore dhe kushtetuese gjatë procesit të krijimit të institucioneve të reja, të dala nga zgjedhjet e parakohshme të 11 qershorit”, thuhet në përgjigjen e Zyrës për informim të Presidencës, për lajmi.net.

Neni 7 i Rregullores së Kuvendit pika 1 thotë se mbledhjen Konstituive e thërret Presidenti i Republikës së Kosovës brenda afatit prej tridhjetë (30) ditësh nga dita e shpalljes zyrtare të rezultatit të zgjedhjeve.

Megjithatë, Kuvendi, sipas Kushtetutës së Kosovës, mblidhet edhe nëse Presidenti nuk e bënë këtë.

“Presidenti i Republikës së Kosovës e thërret seancën e parë të Kuvendit. Në rast se Presidenti i Republikës së Kosovës nuk është në gjendje të thërrasë seancën e parë, Kuvendi mblidhet pa pjesëmarrjen e Presidentit” thotë pika 3 e këtij neni Kushtetues.

Rezultatet e zgjedhjeve të jashtëzakonshme parlamentare të 11 qershorit, janë certifikuar nga KQZ më 8 korrik.

Pas certifikimit të tyre koalicioni PDK-AAK-Nisma si fitues i zgjedhjeve ka 30 ditë afat që ta formojë Qeverinë. I nominuari për kryeministër nga ky koalicion, Ramush Haradinaj ka thënë se institucionet e reja do të formohen në afat rekord. Madje ai nuk e ka paralajmëruar se seanca konstituive e Kuvendit mund të mbahet gjatë javës së ardhshme.