Haxhiu PDK-së: Ëndrra juaj për ta parë VV-në të kriminalizuar nuk do të bëhet kurrë realitet

Deputetja e zgjedhur e Vetëvendosjes, Albulena Haxhiu ka reaguar ndaj akuzave të PDK-së kundër Komunës së Prishtinës, për vjelje të tenderëve me njerëz të afërt të kryetarit Shpend Ahmeti, nënkryetarit Dardan Sejdiu e zyrtarëve të tjerë, që vinë nga VV.

Për t’i ngritur këto akuza, PDK sot organizoi një konferencë të veçantë për media, ku folën Blerand Stavileci, Arbana Xharra dhe Shemsi Veseli.

Të gjitha këto akuza, Haxhiu i quan shpifje, ndërsa zyrtarët e PDK-së qyqarë, shkruan Periskopi.

“Përgjatë gjithë këtyre viteve të qeverisjes së VETËVENDOSJE!-s, në Komunën e Prishtinës, PDK ka ëndërru që ne me pas ndonjë skandal korruptiv! Ka ëndërru që njerëzit e VETËVENDOSJE!-s, në Komunën e Prishtinës, me u përfshi në ndonjë aferë korruptive. Ata kanë ëndërru që ne, me u korruptu njëlloj siç janë korruptuar ata!”, ka shkruar Haxhiu në Facebook.

Haxhiu thotë se ëndrra e PDK-së për ta parë Vetëvendosjen të kriminalizuar nuk është bërë realitet, e sipas saj, as që do të bëhet ndonjëherë, derisa paralajmëron “shkelmin e fundit” që do ta marrin më 22 tetor.

“Kjo ëndërr e PDK-së, nuk është bërë realitet e as që do të bëhet ndonjëherë. Meqë kjo nuk ka ndodhur, tani po mundohen para zgjedhjeve lokale të faktorizohen me shpifje, qyqarët! Më 22 tetor, qytetarët kanë me ju dhënë shqelmin e fundit!”, shkruan Haxhiu. /Periskopi/