“Hashim Thaçi duhet ta kuptojë se nuk është mbret”

Gjatë një konference për medie, kryetari i Lëvizjes Vetëvendosje, Visar Ymeri, ka komentuar situatën rreth dhënies së mandatit subjektit të dytë politik nga presidenti Thaçi, nëse koalicioni PAN nuk arrin t’i sigurojë numrat për formimin e qeverisë së re.

“Së pari, Hashim Thaçi duhet ta kuptojë që ai nuk është mbret në këtë vend. Ai është një president dhe ka një rregull jashtëzakonisht të qartë kushtetues se kujt i takon mandatimi herën e parë dhe herën e dytë”, ka thënë Ymeri.

“Asnjë kriter shtesë nuk mund ta shtojë Hashim Thaçi, sepse nuk e ka këtë të drejtë kushtetuese. Çfarëdo kërkesa apo kritere shtesë që ai e shton është pengim i drejtpërdrejtë i një procesi demokratik në republikën e Kosovës dhe si i tillë, nuk do të jetë i pranueshëm as për ne e as për qytetarët”, ka thënë Ymeri.

Ndryshe, presidenti Thaçi, pas konsultimeve me partitë politike ka thirrur seancën konstituive të Kuvendit për datën 3 gusht.