6 orë më parëNis dëshmia e deputetit të LDK-së kundër Kurtit e tre deputetëve tjerë
Periskopi(8 vite më parë)
(8 vite më parë)Deputeti i Lidhjes Demokratike të Kosovës (LDK), Armend Zemaj ka deklaruar se ai nuk e din se cili nga kolegët e tij nga Lëvizja “Vetëvendosje”, e ka hedhur gazin lotsjellës në hapësirat e sallës plenare të legjislativit të vendit. Deputeti Zemaj, e ka dhënë dëshminë e tij të enjten në Gjykatën Themelore në Prishtinë në […]
Deputeti i Lidhjes Demokratike të Kosovës (LDK), Armend Zemaj ka deklaruar se ai nuk e din se cili nga kolegët e tij nga Lëvizja “Vetëvendosje”, e ka hedhur gazin lotsjellës në hapësirat e sallës plenare të legjislativit të vendit.
Deputeti Zemaj, e ka dhënë dëshminë e tij të enjten në Gjykatën Themelore në Prishtinë në gjykimin ndaj katër deputetëve Albin Kurti, Donika Kadaj-Bujupi, Albulena Haxhiu dhe Faton Topalli.
Dëshmitari Zemaj ka thënë se gazi lotsjellës është hedhur përballë foltores së Kuvendit, mirëpo nuk e din se kush e ka bërë një gjë të tillë.
“Më 08.10.2015 kam qenë prezent, sepse nuk kam mungu asnjëherë në seanca plenare. Ka kalu një kohë dhe detajet nuk më kujtohen, nëse ka diçka të paqartë mundet me shiku në deklaratën time të dhënë në polici. Po është hedhë gazë në atë seancë, ka pas edhe veprime tjera”, ka deklaruar Zemaj.
Ai ka shtuar se personalisht nuk ka pasur probleme shëndetësore nga hedhja e gazit.
Sikur në seancat e kaluara, edhe këtë të enjte, kryetari i trupit gjykues, Beqir Kalludra nuk ka lejuar dëshmitarin që të përgjigjet në disa nga pyetjet e të akuzuarit Albin Kurti, duke i cilësuar ato se janë jashtë objektit të akuzës.
Pyetjet e Kurtit kishin të bënin atë se çfarë i kishte shtyrë deputetët opozitarë në atë kohë të vepronin në këtë mënyrë, duke hedhur gaz lotsjellës në Kuvend.
Deri më tash dëshminë e tyre në këtë proces gjyqësor, e kanë dhënë deputetët Xhavit Haliti, Bekim Haxhiu, Blerta Deliu – Kodra, Flora Brovina, Naser Osmani si dhe Nuredin Ibishi.
Katër deputetët e VV-së janë duke u akuzuar nga prokuroria për veprat penale “përdorim i armës” dhe “pengim i personit zyrtar gjatë kryerjes së detyrës zyrtare”, veprime këto që lidhen me hedhjen e gazit lotsjellës në hapësirat e Kuvendit të Kosovës.
Aktakuza ndaj tyre nga Prokuroria Themelore në Prishtinë, është ngritur më 16 dhjetor 2015.
Në seancat e kaluara katër deputetët janë deklaruar të pafajshëm për akuzat me të cilat ngarkohen.
Përveç tyre, për hedhjen e gazit lotsjellës në Kuvendin e Kosovës, akuzohen edhe deputetët Fisnik Ismajli dhe Ismajl Kurteshi nga Vetëvendosje dhe Haxhi Shala nga Nisma për Kosovën./Betimi për Drejtësi/
