Molliqaj: Rasti i aktivistëve është i montuar, kërkojmë hetim të pavarur për Astrit Deharin

Në “Rubikon” të KTV’së, ai ka thënë se aktivistët e VV’së janë të pafajshëm, ashtu siç kanë thënë edhe provat sipas tij.

“Vetë shitësi i motorit, herë ka thanë jonë kanë dy djem, herë tre djem. Kjo është e papranueshme. Qysh me u ndrru dëshmia. Pastaj, aktivistët janë më të gjatë, e dëshmitari ka thënë se kanë qenë më të shkurtër se ai. Pastaj, Atdhe Arifi nuk e ka blerë motorin, kështu ka deklaruar edhe para gjykatës. Pastaj, sipas dëshmive të FBI’së, aktivistët tanë janë të pafajshëm. Nuk ka dëshmi se aktivistët tanë e kanë kryer sulmin. Nuk mund ta dënosh askënd në bazë të dyshimeve të bazuara”, tha Molliqaj.

Tutje, ai ka folur edhe për rastin e Astrit Deharit, për të cilin tha se kanë kërkuar hetim ndërkombëtar të pavarur.

“U bë më shumë se një vit që Astrit ka vdekur në burg, në rrethana të dyshimta. Familja, avokati e ne kemi kërkuar hetim të pavarur. Qeveria e kaluar nuk e realizoi, me arsyetimin se Zvicra nuk është në BE. Familja Dehari kanë jetuar në Zvicër dhe kanë gjetur institut që kanë bërë hetime edhe për raste të ndryshme. Qeveria e re e ndau fondin rreth 50 mijë për rastin Dehari, por ende nuk është ndërmarrë asgjë. Pse s’po vazhdohet tutje. Nuk është proces i ndërlikum përzgjedhja e një instituti”, deklaroi Molliqaj./Periskopi