Kosovari që gëzon suedezët si taksist babadimër (Foto)

Me afrimin e Krishtlindjeve, kosovari Erkan Arapi do të sjellë gëzimin e festave të fundvitit dhe shumë dhurata në kryeqytetin e Suedisë, në rolin e tij si taksist babadimër.

Që nga viti 2004, Taxi Stockholm ka ofruar një shërbim në të cilin banorët mund të porosisnin një Babadimër për t’i vizituar familjarët e tyre dhe për t’i dorëzuar dhuratat në shtëpitë e tyre.

Një nga ta do të jetë kosovari Arapi që thotë se është shumë i lumtur që do të bëjë shumë njerëz të gëzohen.

Në një intervistë për mediumin suedez, Thelocal.se, ai ka thënë se kishte shkuar në Suedi më 1994 dhe pas 25-vjetësh është shumë i lumtur me shtetin e tij “të ri”.

Të qenit taksist babadimër për dhjetë vjet i ka dhënë atij pasqyrim më të mirë brenda shtëpive të suedezëve për Krishtlindje.

“Kur arrita në Suedi, isha shumë i etur për t’u asimiluar, kështu që mësova shpejt suedisht, nëpërmjet SFI (Program për Emigrantët), gjë që më ndihmoi shumë”, thotë kosovari. “Është një vend i bukur, sidomos Stokholmi, e shoh si kryeqytetin e Skandinavisë. Suedia është vërtet vend i përkryer për të huajt, je i lirë të jesh kush dëshiron të jesh, dhe ajri është aq i pastër dhe i freskët”.

Pastaj, ai tregon dallimin e festës së Krishtlindjeve nga Suedia, në Kosovë.

“Sa i përket Krishtlindjeve, këtu është shumë më ndryshe se në Kosovë, pjesërisht pasi në Suedi është traditë e festave në prag të 24 dhjetorit. Kosova është shtet multietnik andaj ka një miks të traditave. Nuk mund të krahasoni Krishtlindjet në Kosovë me ato në Suedi. Janë dy botë të ndryshme, të dyja të bukura në mënyrat e tyre”, deklaroi ai.