Deda: Demarkacioni kusht që Kosova të ec drejt anëtarësimit në BE

Deda i cili është edhe themelues i subjektit politik ‘Alternativa’, duke folur për synimin e Qeverisë së Kosovës e cila në programin qeverisës parasheh që deri në vitin 2021 të marrë statusin e vendin kandidat për anëtarësim BE, ka thënë se Kosova mbetet ende larg plotësimit të përmbushjes së reformave.

Deda në një deklaratë për lajmi.net ka thënë se Kosova ka plotësuar vetëm 2 nga 22 prioritetet për vitin 2018.

Ai ka vlerësuar se ratifikimi i Demarkacionit me Malin e Zi për Kosovën po bëhet kusht kryesor nga vendet perëndimore që Kosova të ecë drejtë anëtarësimit në BE. Po ashtu, sipas tij, përfundimi i dialogut me Serbinë në vitin 2019 me një marrëveshje gjithëpërfshirëse do të hapte rrugë që Kosova të marrë statusin e vendit kandidat nëse përfundojë reformat e dala nga nënshkrimi i Marrëveshjes për Stabilizim Asociim (MSA).

“Kemi çështjen e pazgjidhur të demarkacionit i cili po bëhet dalë nga dalë kërkesë kyçe e vendeve perëndimore që Kosova të avancojë tutje drejtë BE-së dhe dialogun më Serbinë, i cili në qoftë se përfundon në vitin 2019 me një marrëveshje gjithëpërfshirëse obligative ligjore ajo marrëveshje mund të hapte rrugë që Kosova ta merrte statusin e kandidatit, por jo pa i përfunduar reformat që kërkohen e që dalin nga MSA”, ka thënë Deda për lajmi.net.

Ai ka treguar se përveç vendimit politik nga BE, ky institucion vlerëson edhe reformat e bëra nga një vend që aspiron anëtarësimin.

“Kosova momentalisht nga 22 prioritete që është dashur të përmbushen deri në vitin 2018, i ka përmbush vetëm 2, dhe kjo e dëmton pozitën Kosovës në këtë moment pozitën për statusin e kandidatit”, ka theksuar Deda.

Mosnjohja e pavarësisë së Kosovës nga pesë vendet e përhershme të BE-së, sipas Dedës nuk mund të jetë problem, pasi sipas tij, me nënshkrimin e MSA-së, BE ka gjetur mënyrën se si të ecë Kosova përpara në rrugën euro integruese.

“Fakti që Kosova ka arrit marrëveshje kontraktuake me Bashkimin Europian, ka nënshkruar MSA-në, do të thotë që BE e ka gjet mënyrën se si Kosova të avancojë tutje drejt integrimit europian”, ka thënë Deda.

Edhe pse Kosova ende nuk e ka marrë liberalizimin e vizave dhe MSA është marrëveshja e vetme kontraktuale me BE-në, Qeveria e Kosovës synon që brenda mandatit 4 vjeçar ta marrë statusin e vendit kandidat për anëtarësim në BE. Por, nuk është vetëm qeveria që shpreh një optimizëm të tillë.

Edhe qytetarët e Kosovës sipas një sondazhi të bërë janë shprehur më optimistët nga vendet tjera të Ballkanit që synojnë anëtarësimin se Kosova do të anëtarësohet në BE.