Mustafa pësoi humbje nga Shpendi Ahmeti, por ja çfarë tha për të në tubim përmbyllës

Ai po ashtu i ka ftuar edhe  votuesit e Aleancës Kosova e Re, që ta mbështesin Arban Abrashin për kryetar të Prishtinës.

 

“Jam shumë i bindur edhe njerëzit Aleancës Kosova e Re, njerëzit që garuam së bashku në qershor të këtij viti, njerëzit në këtë sallë dhe në sallat tjera u përbetuan në Ibrahim Rugovën dhe shtëpinë e Ibrahim Rugovës. Dhe unë jam i bindur që ata e kanë pasur përnjëme, sepse jam i bindur se ata duhet të jenë në shtëpinë e Ibrahim Rugovës, duhen të jenë me ne dhe duhet të jenë me ne për kryetar të Komunës, dhe unë pres që vota e tyre do të jetë votë për Arban Abrashin”, tha Mustafa.

Ai tha se kanë marrë vendim që kryeqytetin ta udhëheq një  punëtor, i cili ka përgjegjësi ndaj qytetarëve dhe ka shtuar se LDK, zgjedh njeriun i cili do të vë gur-themele në kryeqytet dhe jo njerëz që gjuajnë gurë.

“Ta udhëheq njeriu, i cili do të vejë një gur në themelet e ndërtimit të Prishtinës. Një gur në themelet e shkollave, qendrave të mjekësisë familjare, të rrugëve, e të kanaleve. Dhe jo një njeri, që do të nxjerrë gurë nga sheshi i qytetit, për të gjuajtur qytetin e vet. Sepse ai nuk e ka vendin në krye të Prishtinës. Ne ju kemi ofruar një njëri të ndërgjegjshëm, një njeri punëtor. Ne ju garantojmë që Arban Abrashi do t’i mbajë premtimet”, tha Mustafa.

Ndërsa, kandidati për kryetar të Prishtinës, nga kjo parti, Arban Abrashi tha se qytetarët janë ata që do të vlerësojnë punën, apo mos punën e deritanishme dhe t’i thonë “ditën e mirë” kryetarit në shkuarje.

“Qytetarët janë ata që vlerësojnë më së miri se çfarë është punuar dhe çfarë nuk është punuar. Çfarë është punuar mirë e çfarë është punuar keq. Do të dëshiroja që në mandatin e kryetarit në shkuarje, të ishte punuar ashtu siç ishte premtuar, ashtu siç ishte zotuar. Por kjo nuk ndodhi. Ai e fitoi mandatin me propagandë, ai e përfundon mandatin me propagandë. Dinë e mirë e ka”, tha Abrashi.

Ai po ashtu në fushatën përmbyllëse ka thënë se me marrjen e  mandatit për të udhëhequr kryeqytetin, Prishtinën do ta bëjnë metropol.

“Kryeqytet që do t’i konkurrojë kryeqyteteve evropiane, sepse ne e synojmë Bashkimin Evropian, prandaj si kryetar i Prishtinës, do të bashkëpunoj me të gjitha kryeqytetet evropiane. Por edhe me Nju Jorkun, Uashingtonin, por edhe me miqtë tanë që na lidhi fortë presidenti ynë Ibrahim Rugova. Ne do të bëjmë ndryshime, këtë e garantoi ju që jeni sonte bashkë me ne dhe gjithë ata njerëz me vullnet mirë nga parti të ndryshme, që u bënë bashkë me ne. Së bashku do të pensionojmë dembelin e qeverisjes aktuale, që për katër vite nuk ndërtojë asnjë shkollë, asnjë institucion shëndetësor, asnjë qendër sportive, asnjë projekt të madh të rëndësishme për Prishtinën. Ne do të ndërtojmë shkolla të reja dhe do të aplikojmë mësimin tërë ditor. Do të ndërtojmë spitalin e qytetit dhe do t’ju ofrojmë qasje në shërbime shëndetësore, do të zgjidhim për 6 muaj problemin e papastërtisë në qytet, do të gjelbërojmë qytet in”, tha Abrashi.

Ndërsa, Gent Begolli, nga Aleanca për Ardhmërinë e Kosovës (AAK), i ka dhënë përkrahje kandidatit të LDK-së Abrashi, duke thënë se është shumë natyrale që AAK-ja është në bashkëpunim me Abrashin, duke thënë se ky bashkëpunim nuk është pjesë e pazareve politike.