Le Monde: Eulex – mision që njihet për skandale

E përditshmja franceze, Le Monde ka publikuar një artikull, në të cilin shkruan se si misioni evropian (EULEX), i cili në Kosovë është përgjegjës për mbikëqyrjen e fushës së drejtësisë dhe trajtimin e rasteve më të ndjeshme të korrupsionit dhe krimeve të luftës, ishte goditur më 2014 nga akuzat e prokurores britanike, Maria Bamieh, e cila i kishte akuzuar kolegët e saj për marrje të ryshfetit për pengimin e hetimeve në raste të ndryshme. Si pasojë e tyre ajo ishte shkarkuar.

Bashkimi Evropian kishte caktuar një ekspert francez, i cili kishte pranuar se rasti ishte trajtuar në mënyrë të mjerueshme. Por, ai s’kishte mundur të hedhë poshtë akuzat. Kështu, rasti ishte mbyllur më 2016, në mungesë të provave, shkruan Periskopi.

E pyetur nga Le Monde, zëdhënësja e trupës evropiane për Marrëdhënie me Jashtë ka hedhur poshtë akuzat e Simmons, duke insistuar se hetimi do të hapet në pranverë, në përputhje me Kodin e Sjelljes dhe Disiplinës.

Rasti i ishte caktuar një ish gjykatësi në Gjykatën Europiane të Drejtësisë – Aindrias O Caoimh. “Ai i ka kërkuar z. Simmons të ofrojë krejt dëshmitë që posedon, por për fat të keq ai ka refuzuar ta bëjë këtë gjë”, thotë zëdhënësja.

Ky rast i ri tregon për atmosferën e zymtë që mbizotëron mes gjyqtarëve në Eulex. Në Bruksel, besohet se Simmons i ka bërë këto akuza pas ankesave kundër tij të formuluara nga dy kolegë të tij, të cilat do të rezultonin në një thirrje para Komisionit të Disiplinës në EULEX.

Simmons refuzon të japë këtë dokumentacion për shkak të pavarësisë së hetimit, ndërsa gjetjet e tij pritet t’i ofrohen eprorëve të tij, dhe jo Federica Mogherini, përfaqësuese e lartë e BE-së për marrëdhënie me jashtë.

Trupa europiane akuzohet edhe se ka mbyllur njërin sy në rastet më të ndjeshme të korrupsionit, në emër të stabilitetit të një shteti akoma fragjil. Kjo ka prekur nivele aq të larta, sa 800 të punësuarit aty që marrin paga të majme duket sikur kanë adoptuar praktikat lokale, në vend se t’i luftonin ato.

“Nuk mund të kemi një mision që një ditë këshillon Ministrin e Drejtësisë, ndërsa të nesërmen një prokuror i tij e ndalë atë ministër”, pati thënë më 2015 Andrea Lorenzo Capussela, një ish i punësuar i këtij misioni në Kosovë.

Por më 2014 pushteti i këtij misioni qe reduktuar. Që atëherë është limituar në mbështetjen e gjyqtarëve kosovarë dhe në trajtimin e një grusht rastesh, kryesisht ato më të ndjeshmet. Sipas raporteve më të fundit, gjyqtarët e Eulex kanë dhënë 620 verdikte që nga viti 2008. Por asnjë lider politik me peshë në Kosovë nuk është dënuar për korrupsion./Periskopi