Këto janë marrëveshjet e LVV-së për rundin e dytë të zgjedhjeve

Lëvizja Vetëvendosje ka bërë të ditur marrëveshjet e arritura me partitë e tjera, për të garuar në rundin e dytë të zgjedhjeve.

Lideri i kësaj partie, Visar Ymeri, ka thënë se LVV-ja ka arritur marrëveshje në ato komuna ku kanë përputhje te programeve.

“Duam që përfundimisht ta qartësojmë punën e LVV-së me subjektet e tjera, aty ku kemi bashkëpunim”, ka thënë Ymeri, duke bërë të ditur se marrëveshjet e arritura janë bërë meqë ka pasur hapësire për zbatim të programit.

“Në komunën e Prishtinës e kemi marrëveshjen me AKR-në, me të cilën kemi arritur dakordancë programore”, tha ai.

Po ashtu, theksoi se ky subjekt ka marrëveshje me Nismën në Prizren.

Kurse, në këtë komunë, Ymeri tha se edhe Hatim Baxhaku i LDK-së e mbështet kandidatin e tyre, porse nuk ka marrëveshje.

“Në Dardanë kemi marrëveshje me AAK-në, me të cilën jemi dakorduar për pika programore. Në Kaçanik kemi mbështetjen si nga LDK-ja, ashtu edhe nga AAK-ja por s’kemi marrëveshje formale tashmë”, shtoi ai.

Ndërkaq, sa u përket komunave ku LVV nuk ka shkuar në balotazh, kryetari i këtij subjekti ka bërë të ditur se LVV-ja në Vushtrri do ta mbështesë LDK-në, në Shtime kandidatin e pavarur, në Mitrovicë AKR-në, në Klinë AAK-në, kurse në Gjakovë Alternativën.

Krejt në fund, Ymeri ka thënë se LVV ka qëndruar neutrale (nuk ka arritur marrëveshje) në komunën e Ferizajt, Istogut, Obiliqit e Malishevës.