‘Zyrtarët e lartë të bëhen gati për thirrje nga Gjykata Speciale’

Sipas avokatit Tomë Gashi, deklarata e ambasadorit gjerman është shumë e qartë për ata që dëshirojnë ta kuptojnë.

Gashi në një prononcim për Indeksonline tha se ambasadori gjerman ka aluduar se në Gjykatën Speciale do të ketë të akuzuar të nivelit të lartë dhe porosia është saktësisht për ta.

“Aludimi i ambasadorit është aq i qartë sa që ish zyrtarë të lartë të Kosovës por edhe këta të tanishmit ta kuptojnë se nëse akuzohen janë vetëm dy rrugë të mundshme. Që vullnetarisht të paraqiten, të mos fshihen dhe t’iu dorëzohen autoriteteve te zbatimit të ligjit në Kosovë për tu transferuar në Hagë/Holandë, ku është selia e Gjykatës Speciale, apo që të provohet gatishmëria e institucioneve të drejtësisë për t’i arrestuar dhe për t’i dërguar atje”, ka thënë ai.

Sipas avokatit, porosia e ambasadorit gjerman nuk vlen për persona të tjerë përpos atyre të nivelit të lartë nëse akuzohen, sepse persona të zakonshëm nuk do t’i pyeste askush, se a do të shkojnë në gjykatë me qejf apo me zor.

“Po ashtu kjo deklaratë jep edhe sinjale se aktakuzat mund të bëhen edhe të fshehta dhe të ju dorëzohen paraprakisht zyrtarëve të lartë shtetëror duke i njoftuar se janë të akuzuar, siç edhe ka ndodhur në të kaluarën në rastin e Ramush Haradinajt, i cili është njoftuar me aktakuzë dhe i cili vullnetarisht i është dorëzuar autoritetit të tribunalit te Hagës. Por shumë të tjerë ish-pjesëtarë të UÇK-së janë arrestuar, dhe janë dërguar në Tribunalin e Hagës për ish Jugosllavisë pa ju dhëne mundësia që të vetëdorezohen, siç ka qene rasti i Ftamir Limajt. Unë kam qenë avokat në proceset në Hagë edhe për Ramush Haradinaj dhe për  Fatmir Limaj”, ka shpjeguar Gashi.