Vetëvendosje ka rritur votat në Prishtinë krahasuar me vitin 2013 (Statistika)

Kandidati i Vetëvendosjes për kryetar të Prishtinës, Shpend Ahmeti, ka arritur të rrisë numrin e votave në zgjedhjet e vitit 2017 krahasuar me ato të vitit 2013.

Në vitin 2013, Ahmeti kishte hyrë në garën e balotazhit si i dyti, me 27 mijë e 415 vota apo 31,8%. Këtë rezultat kandidati i Vetëvendosjes e kishte arritur në raundin e parë të zgjedhjeve lokale në vitin 2013.

Në zgjedhjet e 22 tetorit, Ahmeti është renditur i pari në mesin e 8 kandidatëve për kryetar të Prishtinës.

Ahmeti ka marrë 34 mijë e 407 vota, apo 43,49%.

Kandidati i Vetëvendosjes do të sfidohet në raundin e dytë të zgjedhjeve nga Arban Abrashi nga Lidhja Demokratike e Kosovës.

Vetëvendosja është rritur edhe në votat për asamble komunale. Por, prapë kandidati Ahmeti ka marrë më shumë vota se lista e Vetëvendosjes për asamble.

Në vitin 2013 i kishte fituar vetëm 16 mijë e 14 vota, apo 20,15%. Kurse në zgjedhjet e vitit 2017, Vetëvendosja ka arritur t’i fitojë 24 mijë e 156 vota, apo 31,81%.

Për këtë ka komentuar edhe Shpend Ahmeti në Facebook, i cili shkruan për rritjen e VV’së në Prishtinë.

Thotë se reformat do të vazhdojnë dhe se nuk do të ketë kthim në periudhën para vitit 2013. Thotë se rruga përpara në Prishtinë është e qartë.

Postimi i plotë i tij:

Rruga përpara në Prishtinë është e qartë. Reformat vazhdojnë, nuk ka kthim në periudhen para vitit 2013. Rritja në Kuvendin Komunal si subjekti politik i parë në kryeqytet (dyfishim) dhe rritja e votës për kryetar na e forcojnë këtë rrugë.

Falemnderit të gjithëve për mbështetjen, mesazhet e urimet mbrëmë./Periskopi/