U tha se ishte “ushtari” i Lul Berishës, zbardhet lidhja e tij me Haki Çakon

Kanë kaluar vetëm pak ditë që nga arrestimi i dy personave në Durrës, të cilët u menduan se ishin njerëz të Lulzim Berishës.

Marjel Fierza dhe Genti Ndërjaku, u vunë në pranga të dy të armatosur me pistoleta.

Policia tha se të arrestuarit lëviznin me armë pa leje, por Lapsi.al siguroi sot lejen e pistoletës me të cilën ishte pajisur Genti Ndërjaku.

Siç duket, dokumenti është firmosur nga vetë Drejtori i Përgjithshëm i Policisë. Nga mënyra si e shiti policia aksionin, kuptohej se bëhej fjalë për persona të rrezikshëm. Nëse vërtet janë të tillë, atëherë çfarë shpjegimi ka firma e Haki Çakos mbi lejen e armës së Genti Ndërjakut?

Natën e arrestimit, policia e Durrësit bëri me dije se Marjel Fierza konsiderohej si pjesë e një prej grupeve kriminale të qytetit. Policia tha gjithashtu se 30-vjeçari u ndalua pasi në makinën e tij tip Porche u gjetën dy pistoleta pa leje, njëra prej të cilave ishte e Genti Nderjakut dhe që më pas rezultoi me leje.

I arrestuari tjetër, Mariel Fierza, person me precedentë të mëparshëm kriminalë, dyshohet se është pjesë e grupit që drejtohej nga Lul Berisha dhe Emiljano Shullazi.

Emri i tij u përmend një vit më parë në një dokument sekret i Ministrisë së Brendshme ku flitej për bashkëpunimin mes Shullazit dhe Lulzim Berishës, i cili nga burgu drejtonte grupin e tij në Durrës dhe në terren delegonte urdhrat te personat e tjerë si Julian Meçaj, Marjel Fierza, Mond Çekiçi etj. /Lapsi/