‘’Të hiqet balotazhi, të ketë vetëm një palë zgjedhje’’

Të ftuar në emisionin “Info Magazine”, analistët, Adrian Çollaku dhe Artan Muhaxhiri mendojnë se mbajtja e vetëm një palë zgjedhje dhe të largohet balotazhi, është i mirëseardhur.

Analisti politik, Artan Muhaxhiri, ka deklaruar në Info Magazine të Klan Kosovës se duhet të bëhet reformë zgjedhore dhe balotazhi të mos jetë më metodë për të zgjedhur kandidatët.

Muhaxhiri thotë se është kundër raundit të dytë, pasi në këtë raund bëhen kalkulime jo parimore mes partive dhe kështu deformohet vullneti real i qytetarëve i shprehur në raundin e parë.

“Reforma zgjedhore është një shembull tejet i qartë sa neglizhente dhe e pamoralshme është kjo klasë politike, pasi flasin për reformë vetëm kur kemi zgjedhje, pastaj heshtet dhe kur prapë futemi në proces zgjedhor, prapë flasim për këtë problem”.

Analisti politik, Adrian Çollaku vlerëson se lidhja e koalicioneve jo parimore ndikon tek votuesi dhe gjithsesi ndëshkimi mund të jetë i pranishëm.

“Kur ndodhin këto koalicione jo parimore mund të kemi ndëshkime, e kemi pasur rastin në nivel nacional kur u bë koalicioni PAN dhe votuesi nuk iu shkoi mbrapa. Ne kemi pasur raste kur kandidatët janë dëmtuar që nuk kanë qenë të pranishëm në debate.”, ka thënë ai.

Çollaku ka folur edhe për befasitë që mund të ndodhin në zgjedhjet e balotazhit të 19 nëntorit.

“Agim Bahtiri mund të jetë befasi, Prishtina mund të jetë befasi dhe gjithashtu edhe Gjakova mund të ketë befasi në zgjedhjet e balotazhit”, ka thënë Çollaku.