Policia jep detaje për aksidentin e ndodhur në “Rrugën B”

Afro një orë më parë në “Rrugën B” në Prishtinë ka ndodhur një aksident zinxhiror ku të përfshira kanë qenë katër vetura.

Aty, sipas policisë lëndime trupore kanë pësuar gjashtë persona të cilët janë dërguar për trajtim në QKUK.

Zëdhënësi i policisë, Daut Hoxha ka thënë se dëmet materiale janë të mëdha, por që nuk ka viktima në njerëz, raporton Klan Kosova.

“Disa prej të aksidentuarve kanë pësuar lëndime të rënda por fatbardhësisht deri tani nuk është raportuar për ndonjë me fatalitet”, ka thënë Hoxha.

“Policia me njësitet relevante të saj ka dalë në vendngjarje për të kryer procedurat hetimore dhe për të sqaruar rrethanat e rastit”, ka shtuar ai.