Për çfarë po kërkojnë prokurorët në shtëpinë e Tahirit

Kuvendi i dha leje dje prokurorëve që të bënin kontroll në shtëpinë e Saimir Tahirit, pjesë e kërkesës së plotë të Prokurorisë së Krimeve të Rënda e cila parashikonte edhe arrestimin e tij.

Mësohet se janë të paktën katër prokurorë, të shoqëruar nga avokati i Tahirit që po kontrollojnë në shtëpinë e ish-ministrit aktualisht.

Por, për çfarë po kërkojnë prokurorët tek shtëpia e Tahirit?

Gjatë ditës së djeshme, njëri prej tyre është shprehur se tashmë që kanë kaluar disa ditë nga shpërthimi i skandalit ata nuk presin të nxjerrin ndonjë gjë të madhe prej kontrollit tek shtëpia e Tahirit, pasi dyshohet se ai ka “pastruar” çdo gjë kompromentuese, shkruan Albeu.com.

Megjithatë, prokurorët prisnin që në shtëpi të gjejnë sende të përmendura tek përgjimet e grupit të Habilajve, të cilët kanë thënë se ia kanë dhuruar familjarëve të ish-ministrit.

Kështu për shembull, në njërin prej përgjimeve anëtarët flasin për disa byzylykë të shtrenjt që kanë blerë për nënën dhe bashkëshorten e ish-ministrit. Pikërisht këtë gjë synojnë të gjejnë prokurorët në shtëpinë e tij duke përfshirë edhe materiale të tjera si video, foto, kontakte, etj., me anë të të cilave do të vërtetonin akuzën e tyre. /albeu.com/