PDK akuzohet për dezinormata në Skenderaj: Mund ta dëmtojnë edhe imazhin e familjes Jashari

Iniciativa Qytetare “Dyzetenjëmijë” nga Skenderaj, ka reaguar, siç theksohet në reagim, për një dezifnformatë të fushatës zgjedhore që e ka shpërndarë Partia Demokratike e Kosovës në këtë komunë.

Sipas “Dyzetenjëmijë”, PDK ka përhapur një të pavërtetë se qytetarët nuk mund ta votojnë kandidatin për kryetar të Komunës së Skenderajt, Bekim Jashari nëse paraprakisht nuk votohet ndonjëri prej kandidatëve të PDK-së për Kuvend Komunal, shkruan Periskopi.

“Gjatë fushatës elektorale për Zgjedhjet Komunale në Komunën e Skenderajt është përhapur një dezinformatë nga Partia Demokratike e Kosovës, se qytetarët nuk mund ta votojnë kandidatin për Kryetar të Komunës Bekim Jashari, nëse PARAPRAKISHT nuk e votojnë një kandidat të PDK-së për Kuvend Komunal. I informojmë qytetarët se kjo është një gënjeshtër, dhe një mashtrim i madh, përmes të cilit po mundohen ta tjetërsojnë vullnetin e tyre, dhe njeherit t’i nënçmojnë ata, si në zgjedhjet e kaluara nacionale ku deklaronin se “qytetarët nuk kanë ditur të votojnë”, thuhet në reagim.

Sipas Iniciativës, arsyeja pse subjekti politik në fjalë e bën këtë dezinformatë, është se dëshiron që ta rifitoj terrenin e humbur përmes emrit të Bekim Jasharit dhe familjes Jashari, e në këtë formë t’i mundësohet vazhdimësia e avazit të vjetër.

“Kjo qasje e dëmton rëndë demokracinë dhe ia pamundeson kryetarit të ardhshëm që ta kthejë gjendjen normale në komunën tonë. I bëjmë thirrje subjektit në fjalë që ta kryej obligimin e vet me korrektësi dhe të mos i dezinformojë qytetarët për mënyrën e votimit, sepse në këtë formë e devijojnë vullnetin e qytetarëve”, thuhet tutje.

Iniciativa ka shpjeguar edhe mënyrën e drejtë të votimit.

“Që të jemi tërësisht të qartë: Janë DY fletëvotime të ndryshme dhe se qytetaret janë të lirë që ta votojnë cilindo subjekt politik dhe një KANDIDAT në fletëvotimin e zgjedhjeve për Kuvend Komunal, si dhe në FLETËVOTIMIN TJETËR mund ta votojnë cilindo prej Kandidateve për Kryetar Komune. Ftojmë kandidatin per Kryetar, z. Bekim Jashari, që t’u a bëjë të qartë qytetarëve se ai është i pavarur nga çdo subjekt politik, dhe të distancohet nga këto lloj dezinformatash të cilat mund ta zbehin imazhin e tij personal dhe të familjes Jashari”, thuhet në vazhdim.

“Dyzetenjëmijë” fton KQZ-në, Komisionin Komunal të Zgjedhjeve në Skenderaj, që të punojnë më shumë, për informim sa më të mirë të votuesve, rreth mënyrës së votimit.

“Gjithashtu ftojmë Mediat dhe OJQ-të që të luajnë rolin e tyre duke raportuar rastet e tilla, sepse në këtë formë i kontribuojnë demokracisë dhe vendosjes së rezultatit real të vullnetit qytetar”, thuhet në fund. /Periskopi/