“Mund të arrihet marrëveshja VV-AKR për Prishtinën”

Pas raportimeve të mediave në Kosovë se i pari i Prishtinës, Shpend Ahmeti i ka ofruar postin e nënkryetarit kryesuesit të Asamblesë së Përgjithshme të Byrosë Kosovare të Sigurimeve, Rrahim Pacollit, një gjë të tillë nuk e ka konfirmuar ky i fundit.

Pacolli në një prononcim për Indeksonline, ka konfirmuar se ka pasur një takim me Ahmetin, por, sipas tij, ende nuk është arritur asnjë marrëveshje.

Sipas tij, ata kanë biseduar për interesat e Prishtinës në të ardhmen, duke thënë se nëse arrijnë marrëveshje ata do shkojnë bashkë në balotazh.

“Nuk është arritur ende asnjë marrëveshje, por mundet të arrihet në ditët e ardhshme. Kemi biseduar për interesat e Prishtinës në të ardhmen. Nuk është arritur ende, por nëse arrihet do të shkojmë bashkë në balotazh”, ka thënë Pacolli.

Ndërsa i pyetur nëse ata kanë zhvilluar takime edhe me Lidhjen Demokratike të Kosovës, Pacolli ka thënë se ai nuk e di nëse partia ka pasur takime me LDK-në, mirëpo vet ai thotë se është takuar vetëm me Shpend Ahmetin.